“Cheraw dance, World Record ka siam” i ti a, Minister hova in Hallelui tuar tuar lai khan, ralkhat-ah TV-ah kan lo thlir ve che a, mipui tlim hmur kâra i meizial zûk khûk vung vungte kha a langsar teh asin. Mi ramah chuan a langin meizialte hi a zu pût pût tawh lo, nang lah chuan Bus chhûng-ah pawh, ka zial zûk avang hian mi an rui ang tih ngaihtuah duh miah lovin i zu khu vung vung reng mai si a.
A seh hlumtu ang maia i nui sen sûng reng ringawt pawh hi Mizo hmêl ti bâltu i ni tih lah i ngaihtuah duh der si lo.
I khawpui Aizawl i chhuan ve êm êmte hi han en teh mah, Kawng zîm lutuk avanga, kea kal chak zâwk châng awmna khawpui hi, mi khawpui kalkawngte chu a zau mai ni lo, hmuhnawm khawp hian a ropui asin.
New York khawpui khawng
Beijing khawpui kawng
Tokyo khawpui kawng
I khawpui-ah chuan, kham pangah In a rah fir fer a, tuihawk pawhin luan ngaihna hre lo lekin, a khat thei ang berin In i sa khat tlat tawh mai si a, engti khawng mahin i chei mawi thei tawh lovang. Mite chuan mahni te tea In sa lovin, an thenawm khawvengte nen society siamin, Builder an saktir a, a ram neitu chanvo bakah Builder chanvo tur engemawzat an sihchhuah a. Inchhawng mawi tak tak, thlir vawng vawng pawha thlir ninawm loh tur an sa a, hmun zim te pawh nuam takin, society nuam tak din thei khawpin, an khawpui an rem thin asin.
Pune
Imphal Langol
Singapore
Infiamna lamah thangtharte chhawr tur hmun tha reng reng tun thlengin ila nei lo, i khelmual neih len berte lah Assam Rifle ta i hman hawh, eng emaw changa i mamawh huna an pek phal loh che a la ni lehnghal. I thenawm lawk Imphal khelmualte hi han en teh. An kawngpuite pawh i khawpui kawng ai chuan a chhuanawm khawp asin.
Aizawl Lammual
Imphal khuman lampak
Imphal khawpui kawng
Cheng nuai hnih khat vel lek Capital neiin Dâwr i hawng ve a, dâwr lah chu i har êm êm lehnghâl, “Min hniam thei ang em?” an ti dêk dêk a. “Theih loh” i ti bûl hmuk a. Mite chuan vaibelchhe têl hmangin dawr an kai a, nawrlirh nên duh duh thlan zung zung theih tur an rem tuarh pawhin, nui sangin anmahni dâwr tute a an lo lâwm thin asin. 
Chutichuan, khawvel thilah heti khawpa inchhuanga, induh tur i awm lo chung hian, chhuan tur pakhat chiah i nei, chu chu NUNNA KAWNG kawhhmuh theitu i nihna kha a ni e.
18 comments:
Ngaihnawm hle mai.... Keipawh ka chhut ve neuh neuh fo thin. Mizote kan khu lutuk hi... I blog en hi a nuam chhungkaw nuamtak bak a thlakhleh tur hi a awmlo.. Home sweet home a ni ringawt a lawm, ka lawmpui che :-)
@sawmpui: I huatthu ka sawi lova ka lawm e, kan chhungkua maw ? a nuam lo, kannu hian tunlai phei chu thuneih inchhawk a rawt a, a hlawhtlin hun pawh a la awm maithei. Pawnfen lesak kan tan tawh bawk si a.
A ni ngawt tak asin... Kan ramah hian thil engemaw thlentir tur chu kan la nei chiang a ni.. Kan zirna, thiamna leh thildang zawng zawngte thlir hian heti mai hi chuan duhthu chu kan kan sam zan lo deuh a ni...
Pu Rokunga hla 'Hnam lungmawl tual kan lenna...' tih kha min ti hre chhuak, i post chuan.
Heathrow atangin Kolkata kan han thlawk lut thut a, Serampore-ah kan han tlan lut zui a, mi hi a lo va inchangkan hleih theih ngai em, ka ti! Mizoram chu sawi thleng lo mai ang.
Mahse, ka ti, kum 20 chhung rambuaiin development zawng zawng a hrek char char hnuah hmanni lawkah hmasawnna lam hawiin ke kan pen tan ve leh thei chauh va. Hma kan sawn chak ve si zia hi ka ngaihtuah tel ve ta fo mai.
Hawh i ti ti teh ang, ti tipui i nuam dawn riau-a hriatna te ka nei.. hahaha..
i sawi dikin i sawi thiam thin ngei mai, awmhmunah ka lo Amen thuai thuai.
@ cobte : A ni ngawt mai ti raw
@ mesjay : I ngaihtuah ril hle mai a.
@ faka: Unaupa, kan changkan chak zia lam i lo thlir daih a, a tha Rev. chin chuan positive thinking hi neih tur. Kei erawh chuan, engmah ni tehchiam si lo, thaw lian ve ringawt, meizial pet kawh vu chunga, then thi sung reng mai tur kan ni em ? tih lam hi mi kap tu a ni e.
@ varte: Ti ti tak tak ang hmiang, ti tipui tur ka duh teh asin. Khawi lam atanga rawn tla chhuak nge ka nih leh, khawi lamah nge i len ziai ziai tih lah kan la inhre chiang si lo. Mahse kan la ti ti dun mawlh ang.
van han ziak tha tak. Kan zir tur hi a tam hle mai.
A ngaihnawmin, chhinchhiah tlak khawp mai. Hetih rual hian "development" hi chhut chian erawh a trul khawp mai. Khawvel dang paradigm hian side effect a nei nasa em em mai a. Living standard modern deuh rut lem lo, awlsam zawk si, hrisel si hi Mizoram tan ka duhsak zawk tlat. Hei hi rethei zawk ten an hrut ve theih tur niin ka hmu.
@illusionaire: Ka lawm e,
@ epistemology : THlirna hrang hrang atanga thlirin kan la chhe lutuk lo tih erawh chu zep thu awm suh.
tunah hian mikhual ka nei mek a “Ni khatah Kuva Rs.50/- man ka ei thin” a ti tak tak :D ...hna pawh a thawk lo!!! ...
dawr chungchang vel i ziah khi :D .. inrinni hmasa khan khi ka mikhualpa khi "vai-bazarah" ka kalpuia ..dawr neituten an lo treat dan chu mak a ti tawp.. nui sang chungin a kawh apiang an han "show" vela..
Kei inthalhrung pek..a lei don lo tih ka hriat vangin vai tawngin "ka pu kan lei don tak tak lo" te ka lo tia mahse "no problem" tih pahin an dawra thil te chu min han "demo" sak kual vel a..
@ Blind Dayze: Mi lawmna tur comment in siam thiam bik a, ka lawm e.
A va tha ve! Ka lo chhiar tlai bik lehnghal a. Thuziak thiam tak i ni, i lehkhabu pawh chhiar ve ngei ngei tur a nih hi..
Va thawh tha ve, thlalak nalh tak tak nen, fanute ho hlim hmel nen, Imphal lam photo pawh a ngaihawm e. Thu awmze nei leh fuihna tha tak i tarlang bawk sia, tha tak a ni e. I chet tlatna hmunte chu a lova pui tawhin i kawrfual hakte pawh a puithu hmel ta hle mai? Ka lawmpui che. Dr. Hlua, Imphala awm ve thin kha ka ni e.
@ Hlua : Hlua ka hre lutuk che a lawm, insawifiah a ngai lo. Ni e kan changkang ve hmel ti raw, mahse kan chhangchhia, ka blog i lo leng lut ve hlawl mai hi ka lawm a ni.
Tha fu mai.Mahse, vai rama awm tak avanga mahni pian leh murna ram sit ta viau hi an awm chawk reng a.Foreign i thlen hunah phei chuan...??? I selna anka rual hian a thawi damna kawng turah rilru han seng tel ta la that hmel. Bakah Aizawl kawngpui leh Beijing kawngpui han khaikhin vel te chu a intu lo lu deuh lo maw ! Tin, heti zat chhungkaw thlalak blog-a dah hi i in-advertise-na nge mi dang elsenna...??? Huh !!!
Duh tak empee i ti tha lutuk, thlirna tlang khat chauhva thlira, miin min fak hian, kan ti tha tak tak emaw kan ti thin.
Mahni ram chu hmusit lo e, hun awl neih apianga haw kan chakna, hun neih loh pawha kan ngaih vawng vawng a la ni reng asin,
Ka Selna anka hi faknaa thlak pawh ngai lovin, Mizo nih hi tun thlengin nuam ka la ti.
Mizo fakna hi nikum hmasa, June thla ni tain ka hria, VANGLAINI chanchin bu-ah ka ziak tawh a. Kan thu ziak hi kan ngaihdan zawng zawng tarlanna a ni lem lo, Darthlalang pakhat kan dah mai lek a ni e.
Ka hre lo le, Bloh hi eng atana hman tur nge tih ziaka chhiar ka la nei si lova, kan chet velna leh kan rilru vei zawng, thian ten min lo hriatpuiin min lo hmuhpui se tih rilru pua tar chhuak mai ka ni e. Ka lo ti dik lo a nih chuan, Blog hman dan tha ka va hre chiang duh em.
Dik tak chuan ka Blog pawh hi ka thianpa min siamsak, a hman dan min hrilh that duh leh si loh, keima thiam ang anga ka chei ve nawk nawk a ni a. Ka thiam chhun chhun hi ka hmet chhuak tlut tlut mai a ni.
Chei mawi ka lo intih ve naklai a.
Min rawn tlawh avangin a hmasa berin ka lawm e.
Kha daih kha sin ngaihtuah peih tan chuan. Dik vek i thlirna point khi. Mahse hma kan sawn ve viau tawh hi kan ram pachhiat te han ngaihtuah chuan...
Zoram tang fan2 ti zel rih phawt mai ang aw....
Post a Comment