A tobul chu: He thu ziak tur hian thil tam tak pal tlang ka nei, thil dang a ni lo, kum 10 chuang zet khawsakna inhre pawh tawh lo, Thianpa tia inko ngat thin kha Facebook atangin inhnaih têah kan lo khawsa dûn reng a ni tih ka hai chhuak nawlh mai a. Aizawlah a haw trêp tawh, a haw hma ngeia tlawh ka ba. “Cobte Blog update nan Hyderabad va tlawh ang hmiang” tia ka sâwmna pawh a lo yes thei hlauh bawk nên, kan kal ta ngei a.
Chet zei a va har ve le : Kan chuanna tûr Rêl chu a lo thlen hma darkar chanvea thlen khalh kan ni bawka, engkim zei taka tih kan tum, kan platform pawh No. 4 a ni tih an lo târ kiau, tumah zawt buai lovin kan pan ding nghal, S1, 57 leh 58 a thru tur kan ni. S1 chu khawi lai zawn nge tih kan hre thei ta tlat lo, kan platform zâwna min khawhhmuhtu khâwl chu a chhe tlat, Rail lo thleng sela S1 zâwn chu kan pan mai dawn nia tiin, Rêl kawng ek thing bulah inti zei takin kan lo ding tau mai a, tlai dar 4:30 a chhuak tur kan ni, minute 10 a la awm tihah, Rel chu dar 4:40 ah a lo thlen tur thu an rawn târ chhuak leh ta, an târ chhuah atanga minute 5 lekah Rêl a lo thleng ta ruau mai, mipui an che suau a, chu Rêl chu kan Rêl chuanna tûr a ni dawn em ni ?. Dar 4:30 chauh a la ni si, mipui an chêt suau siah chuan kan seat lam chu pan ve a ngai ta. Kan lo dinna kha S7 daih a ni, S1 lam panin kan phei ta ngar ngar a, kan va thlen chuan chu Rel bangah kan hming an lo tar kiau a, kan chuanna tûr ngei a ni e, kan lût fel ta.
He India Rêl-ah hian chêt zei a va har êm. Ka haw lam pawh RAC ticket a nih avangin kan kal hmain phone lamah confirm a nih thu hre mah ila, seat No. erawh min hrilh nghâl thei si lo, platform-ah bawk kan seat No zawngin kan buai leh ta, an târ chhuah thinna lah a ruak huai reng mai si, seat No zawngin kan kal kual leh ta ngat ngat mai a nih kha, rel a lo thleng trêp tawh si, phone atangin check leh ka tum lai takin min rawn message ve leh mai bawk a, kan nui hui ringawt. Rêl a lo thleng chawpchilh nghâl, kan seat-ah kan han lut a, electric plug a lo awm reng reng lo, Cobtea pek chuan a ringhlel leh ta, a chhuak vut a, enge a tih dawn ka hre lo, a rawn lût leh thuai a, “A dik hmel si” a ti bung nghut a. Kal paha laptop khawih a duh a, a battery a ral têp tawh vânga ringhlel mai a lo ni. Mumbai Express zawng zawng inang vek tûrah a ngai a, buai lohna turah a buai a ni. Engpawhnise, he India Rêl hian min la ti buai zel dawn niin a lang, han vui dawn viau mah ila tih ngaihna tak a awm lo a ni.
Thian dûn intawng : Kum 10 chuang zet inhmu tawh lo kan ni bawk a, “Thianpa, min lo hmuak duh lo mai rawh, kan rawn thleng hma dawn si, zing thawh hma a ngai dawn êm mai” ka tih chung pawhin, a phur ngang a ni ang, zing takah a thova, min hmuak turin a lo chhuak a, mahse Rel station pahnih an neih avangin, a ni lo zawkah min lo hmuak vêl, kan in phone tawn sek ta mai a, eng emaw ti tiin an In bulah kan intawng ta chawt a. Kan han inhmu chu a lawm lutuk kha, patlingpui mah nise, a lai vel niin ka hria. Ka dem lo, ka dem lo che, Thianpa, kan inhmu khât êm a ni ti raw.
Ramoji lamah aw : Kan thleng fel a, an kutah kan innghat tawp. Thianpa chuan Taxi min phone-sak a, Ramoji-ah kal turin kan chhuak nghal a. Eng anga ropui nge a nih hre lâwk lo mah ila, ticket man Rs. 600/- ngawt a nih avangin a hmuhnawm thawkhat tûrah ka ngai. Ka ring dik mai ni lovin ka rin aiin a ropui, a ropui zia sawifiah thiam a har, a hmuha hmuh fiah chi. Kan han lût a, min lo nghâk tu Bus chhûnga lût hmasa ber kan ni, kan khat rang khawp mai, trip khat kan tlin veleh, Gate atanga KM 5 zeta hla Film City chu kan pan vang vang a, Gate ropui lutuk chhûng kan luh meuh chuan, hawina apiang hi a mawi tawh ringawt mai a ni. Thil mawi nia ka hriat aia mawi deuh zel hian min lo hmuak a. Bus chu a ding ta, huan pakhat, a Gate pawh danglam tak, milem âng phuau-ah hian kan lût a, kawng sir ah chuan Music ri riai riai hian min lo awi bawk a, a lunglen thlak rum rum zawk.
In pakhat AC vawt raih maiah min hruai lut a, mak tak mai chu, hmuhnawm rawn show tute chu, Meitei deuh vek zuk nia maw le, kei chuan an thil show-te chu Imphal a ka hmuh tawh thin vangin mak tiin kut ka bêng ve chiam lo. Ka rilrua lo awm zawk chu, Mizo thalai tih ve theih awm tak maw ? tih lamah ka lo buai a, rual awh a na duh khawp.
In dangah min hruai kual leh a, Puk verh ang mai, a thim ruih mai a, thil rapthlak pui pui, ruh ro che hluau hluau te, thil ri rum rum te, kan thuamhnaw vâr a ên phut châng te, a chângin tui khawhthla hnuaiah te, thim ruih hnuaia kawi 30 vêl kan kal kual hnuah kan chhuak hlawl mai chu, kan nui chhuak vur vur hlawm mai maw le.
He huanah hian intihhlimna, Water dance te, ft.20 zeta sanga zuan kân theihna te, leilawn zawh chhuah theih miah loh te, awm mah se keini chu a hmun mawi lam khan kan rilru a hneh zawk a, thlalak lamah kan buai ta zawk vel a nih kha.
Flim channa tak tak chu: Huan atanga kan chhuah hnu chuan, Film channa lam kan pan ta, Cowboy lem channa lamah kan lût nghâl a, rilruah Pistol ringawt zuk langa maw le.
Hemi hmunah hian film siam dan, a takin min entir a, chu erawh chu hmuh fiah bawk a ngai. Hall pakhatah kan thu a, an duh ang min tihtir zawh hnuin, bang emaw kan tih kha, khawngkhar vek a lo ni a, a rual hian a rawn inhawng huau mai a, room khatah ka insawn phei leh a, sound siam dan min entir leh a, room dangah kan phei leh suau a, hetah hian final film chu a lo lang ta. Kei pawhin ropui takin film hi ka chang thiam ve ngeiin ka ring ta a ni.
Mi 20 zet thut theiihna, lift-ah min chuantir leh a, chhawng 37 zeta sangah film en chungin min khai chhova, a tawp kan thlenin, lîr an han ti nghîng mai chuh, kan kal tawhna zawng zawng kha a chim rum rum mai a, keini pawh kan insawi nawk nawk mai, ruah te a rawn sur a, min phuh ve sur sur bawk si, pui dangdai tak a ni. Hei bak pawh thil dang tam tak kan en.
Bus sen in min phur kual ta, Lirnghingin a tih chhiat In lem te, German kawtthler te, London kawtthler te kan fan hnuah, Hospital ropui lutuk kawt lamah min tlankualpui a, a hnung lam chu International Airport a lo ni leh daih a, a chhungah min luhtir a, Thlawhnaah pawh kan chuang nghal maw le.
A thui lutuk dawn, Rs.600/- senga ka hmuh zawng zawng sawi chhuah vek a trul lem lo, Guinness World record a nih chhan nia ka rin chu, khatiang hmun zau em em ni si lovah, nilenga hun kan va hman pawhin, kimchang takin kan la en hman lo kha ni ta berin ka hria. Hetiang hi khawvel hmun dangah a awm ve lo a ni ang.
Laipuitlang tia zet, Lungtum chungah : Ni dangah ka thianpa chuan a Lung lian hriatah min hruai bawk a, a lian reng lah tak a, a len zia chu Laipuitlang tiat ti bakin ka sawi thiam lo. He Lungpui chungah hian Golconda Fort dintupa, Sultan Quli Qutub Shah, summer house tlaran taka la ding hmuh tur a awm. Lawn chhoh hahthlak viau mah se a tawp han thlen chuan, thli a thaw vuk vuk mai, kan hahdam sawng sawng.
Hei lo pawh kum 1590 AD a, Muhammed Quli Qutub Shah in Hyderabad khawpui a din hma daih, kum 1364 AD atanga Sultan Quli Qutub Shah in Lal kulh ropui a din Golconda Fort kan tlawh thu te, Charminar bula ka nupui fanaute tana Parl mawi lutuk mai ka lei thute kal kanin, khawpui lailia an Dil lian bula park kan tlawh thute pawh sawi duah tawh lovin, Hyderabad Mizo Fellowship inkhawma chibai bukna thu min sawitir te pawh, ka lawm thu sawina ni pah fawmin, Hyderabad-ah hmuhnawm a tam tih hi ka thu kharna ni mai teh se.
Taka ka thianpa chu a hming C.Dina, he khawvel kawtthler zawng zawng hi, a duh lai lai chiang taka pho lang thei tura training nei zo tawh a ni. Thianpa, min lo tanpui a ka lawm e.
