Family Photo

Thursday 22 April 2010

MIZO FOOTBALL KHEL THIAM KHEL KA EN.

Football khelh hi ka thiam ve lo, khêlmualah Vawikhat chiah ka khêl ve tawh, chu pawh Team member indaih loh vanga a tikim tu atâna sawm chawp ka ni. Stoper-ah min dah a, nalh lutukin ka lo chhuah thin vangin Goal keeper-in min hau hrep lehnghal. Khel ni lovin ka khâl tawh bawk. Zingkarah exer pahin Bawngkawn atangin ka khalh phei ve a, Vanapa Hall kawtah nalh lutuka ko bang pet per ka tum a, ka inpêt ulh zui, ke bai chungin Ball ka pawm haw hnak hnak a. Chu chu Football nena kan inkawm hnuhnun ber a ni ta.

Football khel en pawh hi ka phur ve surh lo, World Cup lai pawhin hohlim tham enpui tur an awm loh chuan ka mutsan daih zel, Euro Cup an ti emaw ni ? Manchester an ti emaw ni vel pawh hi kei chuan an khel lai a tluanin ka la en ve miah lo. Ronaldo ka hria a, Naldinho ka hria a, Backer an ti emaw ni pawh ka hrai a, Maradona leh Pele pawh ka hre tak e. Chung mite chu Football khawvela ka mi hriatte chu an ni mai. Kei aiin kan nu a la tui lo zawk a. “Patling zahmawh thankin zetin Savun hampuar pakhat inchuh rikngawtte chu, pathum tal inchuh pawh ni hlei lo” a ti thin. Chu em em chu ka zawmpui lem lo. Mahse ka tuina leh ka knowledge hian a pha ve ngang lo a ni.



Mizo zingah Foot Ball khawvela India rama lang pha an sawi ka hre thin. Chu chu Mama a ni. Indian Club league an ti emawni a an khel lai, ka thianten enpuiah min sawm a, Khawpuia awm ve ta chu intih changkan nan tiin Pune Balewadi-a an inkhel lai kan va thlir ve a, Pune Football Club nen an inkhel a, Vai leh Negro ho zinga Mizo tlangval khel Live-a han en meuh chuan kan ding ve hluai hluai mai. Mahse thil buaithlak deuh mai chu, PFC tan lo anga lan kha a ni. Ralkhatah “Maaama” ka han ti ve hluai a. Vai hovin mi rawn en thup mai a, PFC tan lo chu min vuak hlum hi a duh rum rumin a lang a, tan a hahthlak khawp mai. Mama chu an Club-ah a te pawl a ni, mahse ball sem a thiam khawp mai, chu chu a Ropuina niin ka hria.



Mama hi ka unaupa ni awm tak a ni


Mi dang leh chu tun hmaa ka hriat pawh ni lo, Pune ka thlen thlak hnua ka hriat chawp, PFC –a khel mek, JeJe Lalpekhlua leh Rozama te an ni. Anni hi Mama rawn khelh lai khan Under 19-ah India ram aiawhin Irag leh Dubai-ah an kal lai a ni a. An rawn haw hnuin thiante nen an inkhel kan va en a, Kerela ho nen an inkhel a, 3/1 –in an chak lehnghal. PFC-mi an ni bawk a, tan an nuam kher mai, “JeJe, Zama” kan ti reng mai, Vai ho pawh an phur, khuangpui nen kan ri tluk tluk mai a. JeJe phei chu striker-ah a awm a, Vai ho pawhin an au ve nasa khawp mai.


JeJe-a leh Zama, an inkhelh zawhin thla ka lakpui a, a lo fiah tha lova ka ui khawp mai


Mahse kan naute hi lainat ruk riauna ka nei, an la naupan avangin an khelhpuiten an hmingthatna tur an chhuhsak zel niin ka hria, anni lahin naupang zawk nih avangin mahnia khalh tlang mai lovin, thiante an pass kawi zel mai a, ka lo uipui ve thin khawp mai. Chuti chung chuan a pet luttuah tang lo mah se, Pune Daily News te chuan Jeje-a ball pet lai thlalak ngat an rawn chhuah uaih uiah mai chu. Chhiar a nuam khawp asin.

Ka thu ziak ka’n update leh lawk, football en ka tui vang ni miah lovin, kan nu in “Ka en chak ve”, a tih vang leh, JeJe-a’n PFC puala a khelh hnuhnung ber a nih tawh dawn avangin, PFC leh Charchill inkhel kan va en leh a. JeJe leh Zamate hi World Cup Qualifying-a India under 20-a khel turin an thlang a, kum 4 chhung training turin, Delhi lamah min pemsan dawn ta a ni. Chuvangin khelmuala va thlah pawh a phu ve hrim hrim.

Kan va kal a, JeJe-a quata-in VIP thutnaah a free in kan va thu lehnghal, a man pek tur nise Rs.200/- man lai a ni, mi 17 lai a free-in kan va thu ta vel a nih kha. Player hmelhriat neih chu tihchi deuh asin.

An inkhel ta, mahse JeJe first eleven-ah a lut tlat lo, Charchill lamah Mizo pakhat a lo tel ve reng niin, forward-ah an khelhtir lehnghal, amah chu Lalrinfela a ni. Keini inkhel en ve chu, Team tanbik nei kan ni lova, Mizo inkhel en kan nih miau avangin, PFC tan kher a ngai lo, anmahni avangin VIP thutnaah thu mah ila, Charchill lamah Mizo a awm tlat avangin, “Rinfel” tiin ka ua ta vak vak mai, PFC tantu ho khan min hre chiang se chuan min vaw hlum duh hial ang.

Rinfela a chhuak a, hun tawp dawnah JeJe a rawn lut ve leh ta, PFC kan tan leh ta em em a, a au uar uarahte chuan ka tang leh ta vel, kan bula thute khan mak mi ti ve ngawt ang chu. JeJe-a’n penalty a hmu lehnghal, kan ding hluai a, mahse an Captain Goalkeeper in pet a chuh leh ta tlat mai. Kan naute hmingthatna tur hi an chhuhsak zel dawn a nih chuan, kei chu Football khel hi en tawh loh mai ka duh. JeJe-te an awm tawh loh phei chuan, football khelh en thu hi vawikhatmah ka ziak tawh lovang.

Kan nu, kei, Naoba, Rinfela

Wednesday 21 April 2010

VAI INNEIHNA-AH KA TEL VE

Inneih hi a ropui thei ang bera buatsaih a tha nge tha lo ka hre lo, Inneih lawmnaa senso teuhva leiba rulh leh ngai, Mizo zingah an awm em tih pawh ka hre lo. Hnam dang zingah chuan an awm tih ka hria. Ka nupui neih tum erawh chuan sum neih loh nen, cheng singkhat vel chiah sengin, mi 200 rualin min lawmpuiin, Meitei Sangha ruai hmangin ka chhungten min lawmsak a, a ropui ka ti kawp mai. Inneihnaa kan sen tlem avang khan tun thlengin kan inneih a ngheh lohna ka la hre lo. A chang changin kan nuin min hau deuh hlak hlak e tih mai loh chu.
Kan thianpa Nobby in, Dt.16 December 2009 khan Mumbay-a a nupui neihnaah tel ve turin min sawm a. Vai inneih chu a pui beng beng khawp mai, thu ziaka fiah chi pawh niin ka hre lo. A thlalak hi en tlang ila a fiah ber ang.

An chei par thei khawp mai






Ha fual ve asin


Cake man hi Rs.5/- ai chuan a tam maithei



Ka vei lama mite hi kan zirtirtute zinga tawng hriat har berte an nih hi.


Miss Donhring hian thla min lakpui a chak phian a, kan dawh fuh khawp lehnghal

KA LEHKHABU

Lehkhabu buatsaih hi thil namai a ni lo, ziak tur pawhin a thlarau in a thawh ve a ngai a, a thawh loh tum chuan, mihlim nu ho dak lai ang maiin kan ro tlat mai a, thlarau in a thawh tum erawh chuan, a buak hian a baw hawk hawk mai a ni. Ka thu ziak, chanchinbu hrang hrang leh Lehkhabuahte min chhuak sak tawh ka han chhut let a, 34 a lo tling ve ta reng mai. Hetiang hian lehkhabu 2 chu ka sual thlu ve ta a.

A pakhatna zawk chu, kum 1996 khan ka hun awl neih remchanga hmangin, Lehkhabu pakhat chu ka’n sual thlu ve reng reng teh ang tiin, theihtawp chhuahin ka bei a, BER thla a lo thlen meuh chuan, Lehkhabu pahnih ka sual thlu ve der mai. Pakhat zawk chu ‘Thawnthu’ a ni a. A bua chhuah ka huphurh avangin, a manuscript-in ka kawl tha a, mi ka chhiartir a, an hawh kual ta chiam mai a, zawr hnapin min kir a, tunah ka File tha ve ran reng a ni. Pakhat zawk erawh chu, ‘Mizo Politician-te zin kawng Bih Chianna’ a ni thung. Hei hian ka hun tam ber a la a, lehkhabu ka chhiar nasat phah hle bawk. Ka hahpui em avang leh, politics thu inchuh, tun hun thlenga hnam nun nghawng , bih chian ngai tak tak ka hmuhte, pho chhuahna remchang nia ka hriat avangin a Bu-a chhuah ve ngei ka tum a, vawi khat ka ziak chuak a, ka ziak nawn leh a, khawl-in kan chhu chhuak leh a. Chu chu Mizoram Publication Board hmaah ka hlui a, mahse, “Tun tumah chuan kan thlang lo phawt mai ang” tiin tawngkam tha takin min hnawl sak a, hmel hriat tha ka neih ve loh vangte pawh a ni mahna..!

Chutichuan, hun engemaw chen ka thulkhung hnuah, khawvel hmasawnnain a hrin, Computer-te hial kan In chhung a lo luh ve takah chuan, ka lehkhabu buatsaih pawh chu a Bu-a chhuah theih turin, Computer-ah chuan ka thun leh ta ngat ngat a, ka tlangval laia ka ziah kha, Computer-a ka thun meuh chuan, nupui fanaute nen kan kawi diah tawh. Computer zirna nei uk lova lei ve tawp kha ka nia, phek 10 lai ka chhut zawh tawhte hi, ka save tha ve emaw ka ti a, a lo bo leh daih thin a. Ka nupui hnenah vui aw takin, “Ka thil chhut a bo leh daih” ka’n ti dek dek a. “Ninawm, a bo ti reng mai, Compu, Compu i ti a, i nupui fanauten kan chang tawh lo che a nih hi, duh leh bo vek rawh se” tiin min chhang vin hluk a, a beidawn thlak thin khawp mai.

Computer-a ka thun takah chuan thu pakhat chauh ni lo, tun hmaa ka thu ziah, Chanchin Bu-a min chhuah sak tawh, Kohhran leh Politics tih leh Mizote leh Hmeichhia tih thu, ka siam danglam hnu leh C.Laizawna ANITA ka bih chianna ,Valalruata Sailo, Lengpui nena THU LEH HLA Chanchinbu-a kan inhnialna ka thun tel a, A bu hmingah BIH CHIANNA ka vuah a, phek 240 zeta chhah a lo ni ta.

Computer-ah chhut sa vekin ka nei tawh bawk a, print chhuah chauh chu senso a tam lutuk lovang chu tiin, Press-ah ka kalpui a, ka rin ang ngawt chuan a lo tlawm chuang reng reng lo mai a. Senso tur an tih leh ka pawisa neih a inmil ta awzawng lo. Mahse bei ka ti dawng duh chuang lo, ka printer neih veah mi en theih turin Bu nga ka print chhuak a.

Pu Sapdanga’n Printer ropui tak a neih tawh kha maw tiin, ka lehkhabu leh ka chhut chhuah sa Disc ka thawn ve tawp mai a, min phurpui chuan a khawl lianah darkar 3 chhung lekin Copy 1000 te chu a lo chhu chhuak mai ang ti a, beiseihna sang tak nen ka lo thlir laiin, a ni Pu Sapa lah chuan MJA President nih chhuanlamin, “Ka la chhiar hman lo” a ti reng mai bawk si. Engpawhnise, ka pawisa neih huna chhuah turin, a bu ti hlu zual atan tiin, Introduction ziak turin Pu Vanneihtluanga ka ngen leh tawp mai a, min hmelhriat lo mah se, thu ziak mi a ni a, Introduction te chu a lo ziak ve thuak thuak mai ang chu tiin, beisei ka lo ti sang ve ngawt a, mahse mi tul tak a lo ni si a. Ka Lehkhabu pek chu Dawrah a dah a, a lo ti bo daih lehnghal a, lehkhabu pek tur dang ka nei tawh si lo. Ka phut zui duh ta bik lova.

Engpawhnise, ka fanu Class II zir laiin, an School Home Work-ah, Writers hming ziah tur an ti a, Writers hming a hriat zingah ka hming a telh ve tlat mai si a. Ka Lehkhabu pawh chu ka pawisa neih nen inmil tawka chhuah ngei a ngaih phah ta. Ka Meitei thian Chiteshore nen tang dunin, kan print dun ta ngat ngat mai a, Copy 100 phei chu ka kut chhuak liau liau, a ziah leh a chhut leh Cover design siam leh print leh binding thlengin, tuma puih lohvin ka zo ve thak maw le. Ka Lehkhabu-in khaw eng a lo hmu ve ta kha, kei chu ka lawm tawk hle a, min hlut saktu ka tawn ve nual avangin, chu chu ka thawhrah, ka lawmman dawn-ah ka ngai.

A pahnihna chu awlsam zetin ka chhuah ve thung, ka article ziah lakkhawm leh thawnthu tawi ka phuah tel khawm a ni. A bu hmingah HAH CHAWLHNA ka vuah a, hetiang hian thu hmatheh ka dah ve ngat a.
Tu sawi leh sel ka phur bik lawng,
Ka Thu leh Hla thamral mai tur
Ka pho chhuak dawn mi chhiar atan.
Thu leh hla kungpui belh zel hi,
Ro sum leh pai zawng aiin;
Ka thlang zawke hah chawlh nan.
Ka sum neihin a zir loh avangin a copy pawh ka siam tam ngam lo, mahse ka rin ai daihin hralh a nuam a, rei loteah kan hralh zo ta mai a, copy siam belh leh ka tum laiin Pune lamah kal a tul leh ta bawk si a. ka siam belh thei ta rih lo a ni. Ka thu thenkhat chu ka Blog-ah hian ka pho chhuak a, chhungte chu. Buh hmunah tih te, Ka lung min len tih te, Ngawlvei Diary tih te, Ka vairam zin tih te an ni.I duh chuan he Blog-ah hian chhiar theihin a awm e.

Monday 19 April 2010

AMEDNAGAR KAN TLAWH

An kawng chu a tha khawp asin.
Mi World Bank kawng leh Zoram World Bank kawng te chu a va inthlau em !!

Pune Mizo Christian Fellowship te hian Amednagara Mizo zirlaite hi kan Preaching Station angah ngaiin Pastor an neih ve loh avangin Sacrament kilpui turin Pastor Davida hovin kan va kal a, hengte hi kan tawng.
Kalkawngah restaurant nuam tak a awm a, Heng mite hi a va kalte chu kan ni.




Heng mite hi an ni kan va inkhawpuite chu


An Biakin pawh a nuam khawp mai

He hmunah hian Mizo zirlai 80 vel an awm , senso a tlem avangin pan tlak tak a ni





Tuesday 13 April 2010

HMEICHHIA AN THA, KEIMAH CHAUH MIPA

Our Family at UBS Circle

Goa Beach with my Korean Boss

At Taj Hotel

Puipuii at Dive Nagar Beach

Nunui at Big Bazar Pune

Tluangtluangi & Zarzari enjoying Beach

With her Mom's arm

They enjoy Park very much
He Blog Archive-ah hian "Hmeichhia an tha" tih Article mawi tak ka ziak a,
han chhiar chhin mah teh.

NGAWLVEI DIARY

Enkawl tha peih lem lo mah se, a fapa mal neih chhun a ni tlat. Zan pawh a rei ta, a lo haw thawm reng a hre si lo, a rukin a zawng ruai a, a chet tlatna thin, veng keltila a tlawm mualte a zawn hnu pawhin a hmu si lo. Beiseina bei ti dawng atan tal tiin, a room kawngkhar a va nam a, chhung lamah a lo inkalh a ni. A au vak vak a, a chhang lo, chu kawngkhar chu Thirtiang-in a kar hawng a, thinphu zawkin a fapa ngei chu a va hmu ta.

Mahni maia chinfel chi a ni lo, Lungngaihna kaichhan a sawm kual a, a rang a rangin a hria apiang an tlan khawm a, Nulate tana room tihbaiawm, chu fapa mal chuan a lo buatsaih a ni tih an hmuh chuan, nghawng valh tawk awm lova hrui mar insuih phelhtu nih chu chakawm lo tak a ni.
Biak In Dar pawh chang pha lo fapa mal chuan, hmuh hmaih hauh loh turin Dawhkan-ah Pen leh Dairy inkeu sa a dah ngat a, a thu ziah chhiartu apiangin an lainat a. A vuinaa kalte ti ti ber pawh a thu ziak chu a ni tlat.

Hei hi a ni a tobul chu, a pa chu a tlangval laiin a luck hle, eng dang vanga luck a ni lo, Pen leh thluak phakar hmanga sum hai chhuak thiam a nih vang mai a ni. Chu tlangval luck chuan inrin lawkna awm hauh lovin an khaw Miss a rawn hawn nawlh mai a. Makpa mawm melh nu leh pate chuan, ni thum tuk thlengin an fanu chu rawn lam an tum lo nia.
Nupa tuak tharte chu hun eng emawti chhung chu an hlim ve chiang a lawm, mahse ro sum lungkhamna mai chuan hun rei a daih lo. Nu ber an cheh zia chu thenawmte ti ti ber a tling nghal pau a. Pa ber pawh a leng zing lua a ni ang. Nu ber lungawi lo, third floor In chhunga ang ri chu a ring narawh e. Pa thinin a tuar ta lo, transfer order a pe lo ang em ni ? chhuah loh chuan... pawi zawk ang.

Pathlawi khua a har hman mawlh lo, a hrai chawi, chunnu pawm a phal loh chu lainate enkawltirin, “Zalen ka ni lo em ni” tiin a fawr zak zak mai le.Chu pathlawi chu Mz-01 nen a leu kual vel a. Pheichham umin Nula ke sir no tak tak, Tin rawng, nimina sen duk, vawiina sen lar lehta-te chu, chu pathlawi Inah chuan an leng a, zuk leng tlut tluta maw le.
Fapa nikhaw hriat hun a thleng ta, pheichham um Nulate chuan a lung an ti awi hauh lo, a pa lah chuan chunnu koh a tum der si lo. Pa fa lung a rual thei lo, nagmah mahni hmunah, kei ka hmunah tiin, mahni lungawina ve ve an zawng ta.

Fapa mal neih chhun chu, fapa tlan bo ang maiin a fawr bo a, Tet laia ban zai takngial pawh hlau a te tuar tuar khan, Daifem Dispensery-ah, hlauhna nei map lovin a inchiu ta mawlh mawlh mai. Thisen zam kal tha lai a pump puah hnu pawhin sim tang e a ti chuang lo.Ban, Ke, Nghawng, course hrang hrang a zawh hnuah, kap bih course-ah a lut leh ta. Chutih lai chuan a ni, a Dairy-a thu ziak lungchhiatthlak an hmuh tak, a hawrawp sin hle mah se, a thu erawh chu hraw tak a ni. A thuziak chu hei hi a ni.

Aw, mi vanduai ka va ni tehlul em
Ka tan nun hian awmzia a nei lova,
Mite chuan enkawltu nu leh pa an nei a sin,
Kei lah chu tet te atanga Nu hmel hmu lovin,
Pawnah ka chhuaka chutah pawh
Misual hmel hmu duh lo ang maiin,
Lehlam hawiin min kal pel zut zut a.
A va na em, tunge min chhan dawn ?
Mi felte chu Pathian fak turin an kal suau suau a,
Kei zawng kawng sirah khawharin ka thu a,
Sawm tu reng ka hmu ngai si lo.
An zai ri leh an hlim thawmte ka hriatin,
Aw Pathian, nangmah fak hi ka chak ve thin a sin.
Ka tan khawvel hi a thim zo ta,
Aw, nun hi ka va ning tehlul em,
Tu’n min dem se dem lo se,
Ka nun hi ka ta a ni lawm ni ?
He khawvelah hian ka leng ve ta lo,
Aw, din that theih nun neih ka va chak em,
Mahse, mahse a tlai zo ta,
Khawnge ka tih tur chu ka’n ti thuai teh ang.