MIN KOHNA LAMAH

In mangtha turin:

Union Biblical Seminary-a kan awm laiin, min kohna hmun hriattirin kan awm tawh. Inthen darh ngai lova chhungkuaa rawngbawl theihna a nih dawn chuan a lawmawm e tiin, kan thawhna hmun tur kan pan hmain Zoram lama kan chhungte hnenah kan haw hmasa te te a, hun rei cham thei kan nih loh avangin kan cham chhungin chaw eia min sawmtute zawng zawng pawh kan tlawh kim thei lo, mahse kum 4 lai chhungkaw kima inhmu tawh lo, kan han inhmu ho dial dial chu, thla hi a muang veng veng mai a ni. Chutih rualin kan haw apianga verandah atanga min lo hmuak tu, kan kalsan dawn apianga mittui nena min thlahtu, ka nu a awm tawh lo, lawm a kim lo a ni.

Aizawl chu Mizo awmna:

Thlahlel hle mah ila, Aizawl kan chhuahsan a hun ta. Khawpui chhengchhia leh kawng zim ni mah se, Aizawl hi chu a va nuam em, a boruak lah khuanu AC a ni ngawt mai a, kan fate chuan kan kalna apiangah “Mizo hlir a ni mai” tiin mak an ti hial. Kan cham chhungin ka document tih fel ngai buaipuiin Sorkar Office hrang hrang ka dawr kual a, a va nuam em, Mizo nu, Mizo pain duhsak takin min lo dawngsawng a, awlsam te tein ka mamawh min tih zawhsak zung zung mai. Vai ramah chuan KA HA.

Api a awm tawh lo:

Kan fate thlahlel em em tu, Manipur-a rawngbawla kan awm laia, dawr bungraw la tura Imphal a lo kal apianga, ei tur tha tinreng rawn kenga, zan khat tal riak lova kalsan thei ngai lo, kan faten “Api” an tih thin kha. Pune-a kan  awm bosan chhung khan, nitin deuhthaw  an aw ri hre chakin a rawn phone thin, kan inhmu tep tawh tihah Churachandpur atangin Aizawl-ah a zuk zin khawthawng a, a unaute nen hlim takin hun an hmang, la cham zel chak mah se in lama miten an ngai tih a hriatin haw zai a rel    thut a, a haw kawngah, zana a riahna hmunah  a thi ringawt nia maw le, a hrilhaithlak asin, naupangin “Api a thi maw, engatinge” an tihte chu, keini puitling pawhin “Engatinge” tih bakin kan chhang thiam chuang lo.

A thih hun la rei lo mah se, in lamah kan haw zen zen thei si lova, chhungkuaa kan haw theih lai chuhin, “Api” lung phun turin Churachandpur kan pan leh ta. Kan va thleng chu “Api” a awm tawh lo, a tute atchilhtu, an hming tak pawha ko ngai lova, “Hmelthanu, Kabawihte” ti hlira ko thintu kha, a aw ri hriat tur a awm lova, a reh duk mai. Thihna hi chu khawvel atan hi chuan a va han tawp chiang tak em. Van lam thlir nachang hre ve lote hian engtinnge an tawrh bik le, keini erawh Van lam thlirin kan inhnem chawp a, Api awm tawh lo pawh vanah kan awmtir a, naupang mai ni lo, puitling pawh chu chu min hnemtu a ni mai. Mihringina kan chanvo hnuhnung ber, Thlan Lung chu kan phun a, kan chhuahsan a hun ta,

Kal a hun tawh:

Eng tikah nge chhungte kan hmuh leh ang, kan awmna tur chu Vai ram, Mizo hmuh tur tlemte an awm ve, a lum laiin a lum hle a, a vawh hunin vawt tak a ni, tih chiah kan hriat a ni mai. Nuam nge tam ang hrehawm, eng chen nge lunglengin kan awm ang…? Chung zawng zawng chu dawn vak chi pawh a ni lo. A hun a thleng a, chhungte kalsan a ngai ta a ni.

Awi karei Lucknow:

Nuam nge tam ang hrehawm tih hre lawk lova kal kan nih avangin, kan dai chin chin kan phak tawka nuam kan um ve a, Guwahati atangin Rajdhani Rel ngatin Lucknow kan pan a, AC vawt hnuaiah hlim takin, min thlahtu ka unaute nen  nui hiauvin,  hmanlai Mizo sipai tang apiang Lucknow-a an tirh thlak avangin, an bialnute lungleng chu, Lucknow chuan an rilru a hneh ngang a ni ang, inti palh hlek se, “ Awi karei Lucknow” an tih thin ngei hmun chu kan thleng ta.          

Apa khawnge kan in tur chu?:

 Chawlhni zingah kan thleng a, a tukah kan thawhna hmun tur panin, Car AC nuam tak  hnuaiah kan duk phei zel zel a, Kanpur khawpui kan thleng ta, kawngpui nuam takah kan tlan zel a, khawpui chanve vel kan tlan hnu chuan, kawngpui atangin kan peng ta tharh mai, kawng a chhe tan, in tha hmuh tur a awm ta lo, kawng a zim tulh tulh a, bawng ek a tam tulh tulh a, kan in luah tur kan thlen hma chuan, kawng nuam chinah kan chhuk a, Car AC atanga kan han chhuak chu, a lo lum hulh mai a, kan Car hire chu Lucknow-a kir leh thuai a duh avangin a man kan pe a, min tlan liamsan nghal a.

Kan in luah tur pana kan phei tham tham chu, kawng sira mite chuan hmuhnawm thlirin min lo thlir a, min en ngawih ngawih mai a. Kan kal zel a, kan in luah tur hmun kan va thlen chuan an lo la zo fel lo niin, in sakna bungrua an lo la dah ruih mai a, a hrilhaithlak duh hle. Engtinnge kan tih tak ang, kir leh dawn ila, kan Car hman khan min hawsan tawh si, invawm lut dawn ila, khawlum hnuaiah electric pawh fit loh, kawnga mi kalte bih phakin,  tukverh darthlalang pawh la awm lo, toilet la hman theih loh. Hetiang hmuna nupui fanaute luhpui chu ka ngam ngang lo a ni.

Thiante kan phone kual a, Kanpur-a MBBS zirlaite an lo thleng thuai a, Unao a kan missionary-pui Tluangtea a lo thleng ve bawk a, kan buaina chu chinfel dan kan ngaihtuah tlang ta. Kanpur atanga darkar khat kal, Unao-ah, Tv.Tluangtea fin phawt mai ang tih chu kan thu tlukna a ni ta. Tichuan tlai ni daiah Tluangtea in lam chu panin kan kir leh ta phawt a.

Tluangtea in atang hianKanpur-a in luah tur zawngin kan phei ta ngat ngat mai a, kan fate lah chuan “A pa engtikahnge kan in turah kan kal dawn” an lo ti vei rawl nen. A ni reng lah tak a, Tluangtea in chu a tet bakah, zanah inchung zawla riah a ngai reng bawk si a, nileng zankhuaa fate thlan tui zawih zawiha an inhruk hliam hliam reng chuan, “LALPA min kohna chu a va mak ve” tih awl tak a ni.

Hindu pachal inah:

Rin loh takin MBBS zirlai Tv.Tlana phone ri mawi kan dawng ta, “Ka thianpa in in pakhat chu a lo hmu a, naktukah rawn en rawh u”. Rang lutukin a tukah chuan kan va kal leh a, in tha tak, kan beiseih aia tha mah zawk hi a lo ni a. Mahse harsatna awm ta chu, a luah man chu Mission-in in luah man bithliah an neih sa aia cheng 2500 a sang a ni. A aia man tlawm leh chhe deuh nise chuan kan buai lo tur. Kan hotupa ka va phone a, “Thla lehah committee kan thu dawn chauh a, ngaihdan siamthiam a har khawp mai” tiin min chhang a. Kan fate puitling ve tawh chu nise, a aia man tlawm hmuh hma chu zawn ngar ngar pawh a theih ang, mahse kan dinhmunin a zir miau si lo.

Zanah kan chhungte kan phone kual ta, “Lo lut phawt mai rawh u, mission tum theih bak chu kan lo tum phawt mai ang” an rawn ti ta hlauh mai le. Kan thaw huai a, a tukah chuan kan invawm lut ta. In neitupa chu Hindu pachal Pandit (Hindu kohhran upa) hi a ni a, kan beiseih aiin a tha phian lehnghal. Thawkkhat chu a veng ta e.

Inkhawmna thar chu:

Chawlhni a lo thleng a, kan rawngbawlna tur Fellowship lo awm sa hmunah kan inkhawm chu leh, naupang tan bawk hriatthiam a har. Tet te atanga Biakin liana inkhawm thin khan, mi in tereuh te te, an khum chung thlenga kan inrem pawha mi 15 aia tam inbeng theih lohna hmunah, current awm loh hleka, thlan zawih zawihna hmun uapah ngei mai, rawngbawlna hmun kan tan ta.

Tawng thiam bawk si lo, hla sakpui theih awm bawk si lo, an che zia thlir ringawt a lo thut ngawih ve reng mai chu, “Apa ka inkhawm peih tawh lo e..” an tih chang te chuan a awm tihpuina lian tak ka nei thin. An zaite lah chu, tu thluk nge dik ber tih pawh hriat harsa khawpin, an ri reru mai bawk si a. Hmabak a va tam em, Thu hril ka thei lo, zai ka thiam ve lo, ka thawhpui phurh kualpui chiah ka thiam. Hmanraw daihzai chu ka va ni lo chiang em.

Indaih loh a na:

Khawpuiah chuan naupang zirna a lo hautak khawp mai bawk a, Pune ai pawhin zuk hautaka maw le. Kan fate 4 tan admission, zirlai bu leh uniform atan cheng sing thum aia tam kan sen a ngai phawt a, an thlatin fee pek tur chu cheng singkhat aia tam a ni leh a, chu chu a tlawm pawl a ni. Chhungten kan in luah man min tumsak tawh bawk si, a bak beiseih chi a ni tawh lo, chhungkaw pa ber hi kan thut ngawih vang vang chang a tam duh khawp mai.

Mahse intumhawp LALPA chu kan hnenah a awm a, tun thlengin kan la nghei lo chu a nih hi. Kan Pathian hi a va tha em.

                 

Goa-ah ka chhûngte nên

Nikum khân chhûngkuaa Goa kal kan pamtûl thu sei tâwk ka ziak tawh a. Faten “Apa, engtikah nge Goa kan kal dâwn” an ti sek bawk si a. Kan tum ṭha leh ta a ni. Tûn ṭum chu engkim a tluang ta e.

MAHSE: Rêl leh kan chhungkua hi kan inmil tak tak thei lo, tuman min pawlh buai loh nân tiin seat ruk (6) kan la a, kan han lût chu le’h Vai tlangvâl pakhat hi kan room ah chuan a lo ṭhu khar mai a, “Helai hi kan room tûr a nia” ka tih chuan a sîr lamah a tawlh sawn a, a ṭhu ve ta reng mai, engtizia nge tia ka’n zawh chian chuan, a ticket chu waiting mai a lo ni a. T.T a lo kal a, seat pêk tur a neih loh thu a rawn hrilh lehnghâl, a nihna takah chuan Zunin bula ding mai mai tûr a ni a. Mahse Mizopa tlawmngaihnain kan bulah kan ṭhuttir ve ta zêl a. Mahse inthlahrunna nei map lovin min rawn nêk tan tan a.

            Zânah lah chuan kan fate mutna mawng lawmah a lo inrawlh vel thûl, an mu ṭha thei lo, Nu berin a sîksawi ṭha leh ta, a hnuai berah mutna ka pe leh ta nge nge a. Zingah Goa kan thleng a, lâwmthu pawh sawi lovin a chhuak nalh mai nia maw le. Vairengte pâwn lam chu ni lo se ka vêl ang.

IN LO THLENG TA MAW: Kan thlenna tûr CSI Retreat Centre enkawltupa nên nikum aṭang tawh khân kan in phone sek tawh a, tûn ṭuma tluang taka kan thleng thei ta chu, ani pawh a lo lâwm ve khawp mai. Nui sângin kan inchibai a, kan mamawh zawng zawng fel takin a lo buatsaih fel diam a. Kan inbual fai a, breakfast te kan ei zawh chuan, kan fan tûr lamah min hruai chhuak nghâl a.

HEI LE GOA CHU : Ka tân chuan thil thar vak hmuh tûr a awm lêm lo, amaherawhchu, Goa hian lung a ti lêng ve hrim hrim, a khaw thlêng awmdân te, a khaw inrem dân vêl ringawt pawh hi, Vai ram hmun dang nên a inang lo. Hmânlaiin Arab hovin Goa-ah hian sumdâwngin, Goa-a chêngte ro hlu tam tak, an thil neih hote te nên an lo thlengpui ṭhin, chutihlai chuan Portuguese sumdâwng ho an rawn lût a, anni chuan pawisaa thil lei dânte an zirtir a, an chunga ngilnei taka an rawn chêt avâng chuan Portuguese ho chu an ngaina ta êm êm a, Missionary an lo luh pawhin kristian-ah mi tam tak an siam nghâl a. Kristian an tam avangin, kawng sîrah Biakin hmuh tûr a tam êm êm. Kum hnih kaltaa an kawng mâm ṭha ang tho kha tûn ṭumah pawh hian a lo la mâm ṭha a. Keinin World Bank kawng ṭha ha hipa kan sawi nên chuan inthlau tak a ni. Kalkawng an neih tam tehrêng nên, kan kalna apiang a mâm par zêl mai a, Aizawl khawpui kawng tlêmte pawh kan enkawl mâm zo lo a ni si a, rual awh a na duh khawp mai. Kan tlân kualna rêng rêngah ngaw hnuaiah min tlânpui reng mai a, keini ve chuan khawpuiah thing a hnawk ti ang maiin, kan thing neih chhun pawh kan kit mang dêr tawh a. A awhawm zâwnga thlir chuan awh tûr hlîr a ni mai, mahse ‘kan zotlâng ram nuam hi chhawrpial rûn i iang e’, kan ti lo thei si lo. Chu lamah chuan kal thui lovin, kan zinna lamtluang i zawh tawh zawk mai ang.   

         

A NI KHATNA CHU: Kan thlenna pa chuan, “Goa-ah hian Beach tih loh chu hmun ropui hmuh tur kan nei lêm lo” a tih angin, khualzinte en tûr hmun ropui an nei tam lêm lo. Zai thiam Latamangeskar-in a donate, Hindu Temple sak thar chu kan kal  hmasak khan an la sa zo chiah lova, tun ṭumah erawh an lo zo fel tawh, pâwn lama a lan dân aiin a chhûng lam a ropui zâwk. Kan nau kalpui pakhat chuan Hindu thil a nih hrim hrim vâng emaw ni, a en duh ṭhak lo.

Kan tâna hmuhnawm zawk chu St. Xavier’s Church a ni. Kum 200 zet kal taa an sak tawh a nih mai bâkah, thih chilh ṭhak khawpa missionary hna thawk, St.Xavier-a ruang ngei he Biakin chhûngah hian hmuh theihin an la dah a. Chutiang hmu thei nih chu inchhuanna tham a ni ve hrim hrim. Sum sên man pawh a awm e.

                                Xavier-a ruang dahna chu

            Tui chen theih lohna Beach-ah min hruai leh a, keini chuan bazaar nân kan hmang ta mai mai, kan mit la ber erawh chu, Tuipui kamah Chakai a vak noh noh mai kha a ni. Mizopa tân chuan Ai-ip chhûnga khung hmiah hmiah châkawm tak a ni.

            Chawhnu dâr hnih a ri ta, Forest Department huan nuam zet maiah, kan lunch tûr kan pai chuah chu, phaitualhnim chungah ngei mai khân kan kil bial taih mai a, kan ei anga rawn ei ve hi an tam khawp mai,  he huanah hian pawisa sên ngai lova intihhlimna chi hrang hrang pawh a tam, keini chuan Beach a tui chên mawlh kha kan châk a, tui chên theihna Beach-ah ngei mai chuan chawhnu pum kan va hmang ta a nih kha.

            Tlai dâr ruk a ri tawh, Zoram lamah chuan zân inkhawm ṭan dâr a rik chuah chuah lai khân, keini chuan tlai ni tla tûr thlîr chungin, Lawng lian chhûngah, Goa ti Goa tu ngei mai chu chênin, a zak lo tâna lam suau suau theihna, zakzum tân pawh ennawm chi hrang hrang en theihna, SANTAMONICA Lawng lianah ngei mai khân kan ṭhu tlar dal mai a. Tuifinriat Lawng lianah dârkâr hnih zet ennawm enin, mi pakhatah Rs.150/- theuh kan zuk chawi vêl a nih kha.

A NI HNIHNA CHU :  Breakfast kan ei zova, kan lunch tûr pai chhuakin min phur chhuak leh ta. Ngaw kârah kan tlan leh ta vang vang mai, Driver chuan “Museum in en duh em” a ti a. Ngaw hnuaiah chuan In pahnih ding hi a lo awm a, en tu mipui an tam êm avangin a hmuhnawm a ni chêk ang chu tiin, en theihna ticket te kan han la ve a, kan thil en chu hei hi a ni. Portuguese mi hausa In hlui, kum 200 chuang zet a upa, an bungraw engkim la awm, tha taka humhalh, Khum leh an mutbu chena la inphah ṭha thlap, an Almirah-a an thuamhnaw la inkhai thlap te nen. Room tina kan thil hmuhte chu a hrilhfiahna record an neih kha an play mai a, kan duh aia rei rei hrilhfiahna ngaihthlâk tûr a awm. Kan thil hmuh zinga ka mit la ber zâwk erawh chu, an êkin mawlh mai kha a ni, thingphel rehpawh, a chhinna awm hi a lo intlar thla duat mai a, a chinna kan han hawng chu, pawn lam aṭanga Vawk-in an rawn ei theih tûr hian a lo âwng huau mai a, ekin khur an hmang lo ve tlat. Mak ka tih zâwk tak chu, an ekin-ah khân mi panga a ruala êk theiha an siam kher kha a ni. Inhmu thei rengin a rualin an ṭhu fur mai thin ni âwm tak a ni.

            In pakhat zâwk chu, a chhûngah thil ropui hmuh tur a awm vak lo, huan lamah zâwk khân, hmanlai mite khawsak dân, an In te, an hnathawh hrang hrang te kan hriatthiam theih nân, a lem an siam chawp hmuh tur a tam khawp mai. 

            Sawi leh sawihnu, kan tâna nuam ber chu Beach a ni mai a, Tuifinriat kam hi Mizoram aṭang chuan a hla bawk lah taka, a boruak a dang zak mai a, bakah mahni ngeiin a chena kan chen theih thil hian min ti hlim a, chu mawlh chu âm-in Beach lam kan pan leh ta, nimina kan kalna ai chuan a tui pawh a lo fîm ṭha zâwk a, mipui zi nuaih nuaih pawh an ziaawm zâwk. Mahse kan hlimpui ber hi a chanchin sawi tûr vak ka nei miah lo nia.