KEI LEH KA CHHÛNGTE ERAWH HI ZAWNGIN, RÊL CHUAN HI ANIA KAN TLUAN LOH THIN NI.

(He blog-ah hian ka thu ziak hma lam thenkhat hi ka dah tawh a, i lo chhiar tawh leh a tawp lam Goa lam hawiin tih atang hian chhiar mai chi).

Ka Rêl hmasa ber chu: Pathian thu leh a chheh vêl kan zir laia, kan hotuten Theological Conference nei tûra, Bangalore-a kal tûra ka thianpa Zohmaa nên min tirh tum khân,Tuirial air field atanga Dum Dum Airport-a kan tumin , flight delay avângin kan Rel reserve sain min tlansan a, culcut-ah thiante tanpuinain ticket tharin Rêl dangah kan in vawm lut leh thei hrâm a, khami tum khân Rêl ticket kan nei ve ringawt a, a kawng hmang engmah kan hre lo, Vai kan inthlahtir a, “Seat-ah min dah ang che, a bâk chu ka chuang thiam ve êm êm ang” kan ti a.

Khua a thim ruai tawh, min hruaitu Vai chuan Rêl banga thil intar a en phei zut zut a, “In hmu em, in hmu em” a ti. Eng nge hmuh tur chu kan hre thiam ve awzawng lo. A kal zel a, kan ûm dâwr dâwr ringawt, banga thil intar lah chu a hmuh chian theih tawh si loh, thim thamah hian min suam a tum a ni zâwk lo maw ? Lalpa min pui rawh, keini thian dûn hi kan bo chiang tawh lutuk.

A lût thurh a, seat sâng êr ûrah hian min dah tawp a, “Tah hian thu rawh u” a ti a, Rs.100/- ka pe a, a chhuak ta daih a nih kha.

Kan seat chan ve chu a ruh ûl mai a, a sân êm âvangin thut pawhin chhuat kan rap pha lo, Vai Puithiam thutin kan thu âr mai a, nghenchhan dûp pawh kan nei ve lo. Kan sira mite chu seat dûp nuam takah thuin, an muthlu diar diar a, an seat lah a hniam bîk si. Ni hnih leh zan hnih ngawt hetainga thu tur kan nih chuan, mawng koki thlâk zin a ngai âwm mang e.

Ruah a rawn sur lehnghâl, a vawt duh khawp mai, kan tukverhte lah chu, thir âwng ser suar, ruah rawn theh lut pheuh pheuh thei hi a ni a, kan sira mite tukverh erawh chu darthlalang a ni bik. Inthliarna a va nasa em, Vai pa khan Rêl kan la chuang ngai lo tih hriain, seat chhe thei ang ber min lei sak a, a hlep teuh a nih dawn hi. Vawt ti tak chungin, chan tawka lungawi mai loh chu tiin, kan Rel chuanna hmasa ber chu kan khurhpui chiam ta mai a nih kha.

Zan dar 10 a ri ta. T.T an tih hi a lo kal a, “Baat Baat” a rawn ti a. Kei chuan a tûk lama kan chaw ei man tur a rawn khawn niah ngaiin, ‘Yes’ ka lo ti puam tâlh a. Receipt pakhat min pe a, Rs.90 ka pe a, “Lo kal rawh a ti ta mai a, ka zui risk ve ngawt a, mutna tûr min kawhhmuh a, a kal bo ta daih a. Ka thianpa hnenah ka va kîr leh a, “ Sawtah sawn mutna tur min pe a, nang hetah hian mu la, naktukah chaw an rawn sem hunah lo la tawp mai rawh, a man ka pe vek tawh” ka ti a, mutna ka pansan ta a.

Ka mutna chu a chung sâng lamah a ni a, a dûp nuam si, ka hahdam ta kher mai. Ka thianpa erawh chu seat ruh teuh chungah a mu ang a, Darthlalang Tukverh pawh kan neih ve si loh avangin, vawt tiin zankhuain a mu hlawm reng ringawt mai dawn a ni, duh leh naktuk lamah ‘side change’ kan ti mai ta lawng tiin ka mu ta siai siai a. Heti hian Rel chuang chu kan ni ve ta reng mai, a ropui tehchiam lo mang e, zanah a mut theih tih lek fang a nih hi, ti tein ka ngaihtuah mai mai a.

A tûk khua a lo var a, bawk vang chungin mi che zia ka thlir kual a, kan thutna side-a thu ve bawkte chu an lo thova, an mutna chu an tung chhuak a, Seat nghenchhan lo ni rengin, mite ang bawkin seat nuam takah a lo thut theih reng a. Keini ve lah chuan seat chhia min peah kan lo ngai a, nghenchhan kawihthleh chungah kan thu a lo nia lawm maw le. Ka nui suk a, mahse Tukverh Darthlalang an nei bik tlat, kan thutna ve chu a chhe hrim hrim a ni ka la ti rilru hram a, chutih lai chuan an Tukverh Darthlalang chu an nam chhova, a pâwn zawkah kan tukverh ang tho, thir awng ser suar a lo awm ve thova.

Hm .. mawl luat vang bawk, Thukverh Darthlalang pawh thlak nachang hre lovin, thir awng kha kan tukverh neih ve chhun emaw kan ti a, kan mawl vangin vawt kan tuar mai mai a lo ni., ka thianpa phei chu zankhuain a khur awm si a tiin lainat takin ka va pan a.

Ka rin ang ngei chuan seat sângah chuan a lo la thu vûng a, ka va thleng chu, a êk chhuak lutuk tawh, kan seat-ah mi an lo thu ang tih hlauhthawn vanga lo îp ngar ngar chu Toilet lam panin a tlan vut a.

A inthiar hlan chuan Seat chu ka kuai ding a, intithei takin bawp khawkherhin ka lo thu vang mai a. Tukverh Darthlalang chu ka pawt thla a, up charha ka lo thu a rawn hmuh chuan, mak ti takin a hawi hu a, “A va nuam ta ve” tap aw tuau hian a ti a. Tukverh Darthlalang chu a en vung vung a, “Hetiang hi kan lo nei ve reng a ni maw, nizan khân lo hria ila” a ti bai bai a. Ka khawngaih khawp mai ka thianpa chu.

Mahse, tunah chuan kan sira mite ang bawkin, inhmatawnin keini thiandun pawh kan thu ve thei ta. Kan nui tlâwrh tlâwrh a, tuma hnenah sawi chhuah loh tur, te kan ti ta vel hlawmin ka hria.

Chaw min va pe ve har tawh ve, dar 10 a ri tawh si. Zan lama ka pawisa pekna receipt chu ka’n en chian chuan, chaw man a lo ni reng reng lo, ka mutna man zawk kha lo ni rengin, “Baat, Baat” a ti kha “I mutna tur” a tihna zawk a lo ni.

Khawnge chaw an chhum?, kan zawng ruai a, kan hmu ta, mahse chaw chhumna room-a kan va lut ve ngawt chu an lo thinrim nasa, chaw man pek kan tum, “Hei hi a man pekna a ni lo” an ti niin ka hria, khawia pek tur nge tih kan hre bawk si lo. Chaw chhumna room atangin, chaw tam tak awm reng siin, riltamin min chhuahtir a, “Bat deu” tih pahin kan chhuak nghawng nghawng ringawt mai a nih kha.

Goa lam hawiin: Kan Seminary zirlai nula tlangvalte nen Goa trip neiin tluang takin hun kan zuk hmang tawh a, St.Xavier Church chhunga Xavier ruang an la dah that te, Beach-a kan intawllen suau suau te, Sap nula pian nalh lutuk, Bikini-a inthuam ka bula lo kal phei zât zât, thla lakpui ka ngam tak chiah loh te, zanah Lawng chhûngah Music tang lutuk kâra Pastor Te-a te nen kan lam suk zak zakte chu ka nupui fanauten chhim ve se tiin Goa kal leh ka rawt a.

Mi 6 tal kan tlin loh chuan kan thlenna turten min buaipui thei si lova, kalpui tur thiante ka zawng ruai a, ka zawn chhungin kal kan tum hun, Christmas leh Kunthar inkar-ah thlenna tur hmun kan chang lo phawt a, January thla bulah kal turin thiante ka sawm kual ruai a, kan chhungkua bak mi 6 ka hmuh belh ta.

Train ticket ka la fel hmak a, thlenna tur pawh ka book hmak tawh. Chutih laiin mi 5- in an rawn thulh leh thut a, mahse mi 3 dang ka hmu leh thuai a, ticket 2 chu ka cancel ta a, kal hma lawkin mi 2 in an remchan leh loh thu min hrilh leh a, mahse anmahni aia hmel tha zawk, Beach-ah pawh thlalakpui chakawm daih zawk, pahnih dang ka hmu leh nghal thuai a.

Kan kal tum hun chu a fuh khawp mai a, Bollywood te leh India President te hial pawh an kal thu chanchin bu-ah an rawn chhuah uai uai mai a. “Kan ti fuh dawn mang e, thiannu Pryanka Chopra te, Rani te nen pawh inkawmna hun kan nei thei mahna” tiin phur tak kan inbuatsaih a.

“Naktuk tlai dar 4:30-ah chuan Goa panin Rel-ah kan chhuk thla vang vang tawh ang” tia bawp khawkherha Varendah a ka lo suangtuah lai chuan, kan fanu tê ber, Step-ah a tlu sual a, heh kak duai chungin a rawn tap lut ta, Hospital pan a ngai ta ruai mai, Doctor-in a han en chuan, a ha a khawih pawi hlauvin Dental Clinic lamah min tir phawt a. Dental Doctor kan va pan chuan kan fanu chu a tlai mut chhuah hun a nih tawh avangin, muhil chungin kan pawm lut a, a mutthilh avang chuan Doctor chu a ngaih a tha ta tlat lo, a chal tlêmin a lo sawh pem ve bawk nen, a heh chu a keu sak zuai a, a thutna lamah “Don’t worry” ti chungin a thu phei a, kan Doctor hmasa kha a phone leh ta. “CT Scan a ngaih ka ring, in Hospital-ah lo en fel phawt rawh u, anaesthesia pek theih a nih chuan, zan dar 10 pawh nise, ka lo phei anga, ka thui mai ang” a ti ta zut zut mai.

Khai le, hnimhlum pek a ngaih chuan, zan tlaivarpui a ngai ang a, Goa chu kan kal lo tawp ang le. A chal sawh pem chu engmah a nih loh zia kan sawi pawhin, “Chutiangin a sawi theih ngawt loh” a ti bur mai si a, kan Doctor hmasa chu kan pan lêt leh ta a. Kan va thlen chuan ani chuan, “Engahnge maw a hlauh thawn viau chu le, keiman ka ti vek ang” a ti sam leh ta êt a. Kan fanu chu a’n en chiang leh a, “A la naupang a, thui pawh a ngai lovang, damdawi ka chawh ang che u a, naktukah kan Pu in entir ve leh rêng rêng dawn nia” a ti ta mai a, kan thaw suai a.

Goa kal kan tum ni zing lamah chuan, an pu Doctor chu kan va rawn leh a, “A tha e, damdawi hi tha takin pe ula a tha mai ang, Goa-ah pawh in duh chuan in hruai thei ang” a lo ti zung zung a, “Lalpa ka va lawm êm, ka fanu hi Goa Lawng lianah ka lampui thei dawn a, min tih damsak zel ang che” tiin, Goa kal tur chuan kan insiam ta sauh sauh a.

Tlai dar 3-ah chhuakin, thenawm khawvengten min thlah laih laih a, Rel station kan va thleng a, Rel chuan hi ka zei loh êm avangin eng Platform-a chuang tur nge kan nih tih pawh hre lovin S-3 zawnah ka chhungte chu ka thutpui tawp mai a, Tlai dar 4:30-a chhuak tur kan ni, kan thiante an lo thleng khawm a, kan Platform tur leh Rel lo kal dan tur min puansak ve reng reng lo, dar 4:20 a ri tawh, Office lamah kan va tlan a, kan Rel chu darkar 9 ngawtin an lo delay chu niin. Hmâna kan kal khan awlsam tea kal kan nih avangin, buai vak lova kal theih mai inringin, phone atanga inquire pawh kan lo tum lem lova, mahse Rel hi kei leh ka chhungte hian kan tluan lohpui nasat tawh avangin, chuti maia fel êta kal thei kan ni lo a ni lehpek awm mange?

Engtinnge kan tih tak ang le ? Kan In lamah haw dawn ila, thiante khan min thlah ve nasa tawh bawk si, kan nu phei chu a thian Sapnu-in ei tur tam tawk nen a rawn thlah thlap a, nui hawr hawrin “Enjoy your trip” kha an lo ti tawh bawk si a, Rel station-a zan dar 1:30 thleng han thut chu, Vai ngal tliang ho ang chuan kan thiam ve dawn si lo. Chuvangin, kan thiante In lamah kan inphur kir leh ta phawt a. Zan chawte kan ei hova, kan fate kan mut feltira, dar 12-a Auto rickhsaw min lam tur chu kan lo nghak ta phawt a.

Dar 11:30 a ri ta, phone hmangin kan han zawt a, darkar 11-a delay a nih thu kan dawng leh ta. A va mak tehreng em, dar 4:30-a kan kal chuan, zan dar 7 velah kan thleng thei chauh tawh ang, mahse Lawng lian-ah chuan kan la chuang hman e tiin dawh thei takin kan nghak leh ta.

Dar 3 rik dawng chuan kan han phone leh a, kan Train number ni chiah si, mahse a tuka chhuaktur darkar 6-a an delay thuin min rawn chhang ta daih mai le !! A awmzia kan hre ta hauh lo mai, mahni ngei kalin station lamah kan va zawt chiang leh te te a, kan hriatnaa la chambang ve lo thil thar kan hriat belh ta. Zan dar 12 a pelh chuan a tuka chhuak tur Train kal dan tur chauh kha, Computer hmangin an lo chhang thin a lo ni. Tin, Train number chu destination inang a nih chuan, number ngai vek an lo hmang thin tihte kan hriat phah a. Kan kalna tur chu a hun pangngai kha a la ni e.

Chhangchhe tak chunga zan tairek kara kal tur kan nih avangin, Pune Mizo Fellowship Vice Chairman-in Artui chhum hminsate min rawn pai hial a, kan va lawm em, keini chhungkaw zin tur hi mi khawngaihna kan va dawng nasa ve le, a mak mange tih mai loh chu sawi tur pawh kan hre lo.

Hmanhmawh takin khaw vawt hnuaiah, kan fate kawmawl-a tuam hlawm chungin Auto rickshaw hmangin kan insawh phei leh ta. Rel a lo tût vu vu tawh, a tlân mai dawn emaw tiin engmah zâwt chiang lovin, S- 3-ah chuan kan han tlân lût rup mai a, kan zawh chian chuan kan Rel a lo ni reng reng lo, nui hui chungin kan chhuak leh dam dam phawt a.

Engtizia nge tia kan han zawh chian chuan, Zing dar 4:30-a chhuak tur chu, dar 5:30 a lo ni leh zawk. Lu a hai ta map mai, heti êm êma buai philia Goa kal tum chu a dik lo, an sawn leh a nih vaih chuan, zan dar 10 velah kan thleng tawh ang, kan buai chhe hle tawh dawn a ni. “Lalpa an sawn leh chuan kan zin tum hi thulh ka rawt ang” tiin ka inhlân zo chiah a. Dar 6:30 an rawn ti leh ta heu mai le.

A chiang ta, thulh hi a dik a ni, duh leh ka Bollywood thiante chu kawm lo tawp ang, hun dang a la tam tho. Kan han inrâwn khâwm a, ticket cancel a theih nghal chuan thulh mai ang tiin Office lam kan va dâwr a, a lo theih nasa mai, chuti taka mangang hmel nêna kan dawr avang chuan, min khawngaih hmêl khawp mai zawk a. Ticket kan cancel a, Rel platform-ah chuan kan pawisa hmuh let tur ang ang chu, labour hlawh semin ka sem ta mai mai a.

Chutichuan, kan Rel ni lo, mi Rel chu kan va luh zuai tho kha maw, Rel Platform-ah zin tur ni awm takin thlâte pawh kan va la ve zuai zuai a “KEI LEH KA CHHUNGTE ERAWH HI ZAWNGIN, REL CHUAN HI ANIA KAN TLUAN LOH THIN NI” tih thu hi zaih phawt a ngai a nih hi, a hnu zelah kan tluan phah tawh mahna.

Dik tak chuan zin tur chu kan ang ve asin

Zan khaw vawt hnuaiah kan fate Rel Station-ah kan pawm hlawm tlat mai a. Zin chu kan tum ruh ve viau asin maw le.

MÂMI VÂRTÊ LEH ETHEL VÂRTÊ

Thupui nêna inmil lo zet thu ziah hi a nuam ve tlat, mahse mil luihtîr kan tum thovang. Englo a nia englo, kum tin khêl lova an lo tih thin, Pune-a Mizo lo awm tharte lawmna, Mizo Student Union Pune, huaihawtin, Ni 25 August 2010 khân, Freshers Meet kan nei a. Tumdangah chuan mikhual ropui nei lêm lovin kan hmang liam ve mai thin a, tûn tum erawh chu khual lian leh khual zahawm hmun dang ami kan hruaituten an sâwm a, an lo remchâng hlauh mai a, Khual lianah Pu Ronald Sâpa Tlau, ZENICS Chairman, Mizoram leh Khualzahawm-ah Pu Lalthuamliana Asst.Core Banking Manager, SBI, Mumbai- te nên hlim takin kan hmang hova, kan hlim kher mai.

Ka sawi châk chu hei hi: Kum tina Pune Mizo Zirlaiten an buatsaih thin ZOZAM Magazine kan khual lian kan release tîr a.

Ani hi Pune (Poona a nih lai) a lehkha lo zir tawh thin, He ZOZAM pawh hi Editor hmasa ber lo ni tawh a ni. ZOZAM an buatsaih tirha harsatna an tawh nasat zia leh tihchangtlun an tumna lama hma an lo lâk dan heti hian a sawi a.

“ Kan Magazine tih changtlun nân mi ropui thuziak chuantîr ve ngei kan duh si a, Puna University Vice Chancellor, thu ziahtir kan tum a, kei kum 22 mi lek kha hma latuah tangin VC chu dâwr turin ka va kal a, a PA hnênah chuan “VC hmuh ka duh a, kan Magazine-a thu ziahtîr ka tum a”, ka ti dêk dêk a, “Copy engzat tûr nge” ? a tih chuan, min ngaih pawimawhsak ngeina turin, “Copy sîngkhat a tling lo deuh” ka ti ve ngawt a, “Chutiang a tlêm lutuk, hun a nei lovang”, min tihsan ta mai a. Min ngaihsak tawh rêng rêng lo, ka haw a, a tukah ka kal leh a, chutah pawh chuan hun min la pe duh lo, hun min pêk hma chu ka kal reng mai ang tiin a tûkah ka kal leh a, He pa chu ka tihsak hmâ chu a lo kal reng dawn a nih âwm hi ti ni âwm takin, inremsiamna min neihpui ta,

“A thu ziah tur chu rawn ziak sa vek la, a that tawk chuan hming kan sign tîr dâwn nia, a that tâwk loh chuan vawi khatmah rawn kal tawh suh ang che” min ti a, ka haw leh ta a. Ka thiam ang tâwkin thu ziak chu ka duang a, huphurh tak chungin ka va pan leh a, a en vung vung a, “Minute khat chiah hun ka pe ang che, i lut thei ang” a ti ta a.

Ka va lût chu, room zaupui maiah hian a lo thu rûn mai a, Mizoram mi ka nih a hriat chuan “Engatinge Mizoram-in Independence in sual vêl a?” a lo ti khur khur mai a, chu chu ka chhân châk zâwng tak a nih avangin, a room-a Chair awm chu ka pawt hnai sauh sauh va, Mizovin Vai kan hmuh hnaih ber, Cachar Vai berh tak te an nih avângin, Mi ropui tak tak, hmun dangah an awmzia hre tu chu mi tlêmte chauh kan nih thute, a hretu tlêmtete chuan tûna kan rama kan Mizopuite khi hriattir ve kan duh a, hetiang Magazine hmangte hian kan Mizopuite hnênah kan târ chhuak thin a ni tih thu ka’n sawi a le’h, a phûr ta khawp mai a, a PA chu min koh luhsak sauh sauhva, ka thu ziak chu a PA a dictate tir ta zung zung mai a, Magazine tanpuina atân pawh Rs.2000/- min pe lehnghâl a” tia a hlawhtlinna ropui tak a sawi mawlh mai khân mi hneh kher mai.

Mi fate chuan an thiltihah hlawhtlin hi an lo tum êm a lâwm, kei ve hi ka pâ lo hlê mai tih te, hetiang renga ka awm chuan, mi ropui chu ka va ni dâwn lo chiang êm, ka dawih si, ka zâm hmâ si, ka beidawng hmâ si, tih mai maite ka ngaihtuah a. Ka te chem chem a ni ber e.

A ropui vak lo naa kan thupui lamah: Kan khual lian chuan Mizoram zai thiam Mami Vârte a rawn hruai hlauh mai a, chu mai ni lovin, Vârte ve bawk, Ethel Vârte pawh Pune-a Hotel ropui takah zaiia awi thin tûrin a lo awm lai a ni hlauh bawk nên, anni hian kan boruak zawng zawng an luah zo a ni ber e.Kei pek chuan thlalâkpui mawlh kha ka lo chak lehpek a, nupuite thlimin ka va lâkpui leh ta nge nge a ni kha.


Kan thing ru tlat: Khati taka zaithiam lâwm si khân, an han zai ve ta cheng a, anmahni tih phur nân pawh, bân vai chu sawi loh, kut takngial pawh kan bêng tha leh peih si lo, kan thu ngawi thup mai a, Mami Vârte phei chuan, "A thiam apiangin min lo zâwm ve ru aw, kut kan bêng tuar tuar dâwn nia, a duh duh lâm theih” a tih ngial pawhin kan ngawi thup mai a. Kei erawh chuan a Hlâte kha ka thiam zâwng a nih ve loh avangin ka inthiamchawp a, mahse zaipui thei thalai rualte khân han zaipui ve thin se, kutte kha lo bêng tuar tuar ila, a zaite ngei pawh an phûr dâwn tehrêng nen. Hetiang lamah hian Mizote hi kan hniam leh tlat thin.

The End : Thil dang chu sawi thui duah lo mai ang, a hlim chu kan hlim khawp mai, kan thalai ten an talent chi hrang hrang an show pawh zahpuiawm lo tak vek a ni. Ka ti tawp thut.

A hminga Adviser-a min ruat ve takah chuan, hun hmasa kharna tawngtaina hmang theia ka awm ve kha ka lawm khawp mai.

KA SIPAI THIAN

Chuti taka inthian tha pawh kan ni lo, hnam dang zingah, ka Mizopui lo awm ve ta chu, eng emaw ti tiin kan inchhar nawlh mai a. Amah chuan bel khat pawh a la bel lo, mahse a lal em em si. Amah aia rank sarih vela lal turte hrual vel tu a ni.

A pu turte hrual vel tu mah nise, a lal lai chuan lal tak a ni. Englaipawhin a hrualte chu a hmaah khawng taka an kal loh chuan punishment a pe hmiah thin. A zirtirna hmunah phalna la lova vawi 3 ngawt an absent chuan, Army Officer lian tak ni tur kha a hnawt chhuak hmiah thei bawk.

A hnathawh ropui tak inlar chhuah ni a thleng ta, hmuhpui ve ngei turin min chah a. Thil ropui vak a nih ka beisei lem lo, mahse Canteen dawr a remchan dawn avangin min sawmna chu phur hmel zetin, “Kan lo kal ngei ngei ang” kan ti a. Kan kal ta a.

Rin ang ngawt a lo ni lo, an Camp peng kan thleng chiah tihin Police-in min lo check nghal pang a, Kan Motor numberte an note fel hnuah min kaltir ve leh mai bawk a, Camp kan thlen tepin Sipaiin min lo dang leh.

Khawnge in kal dawn?,

Kan thianpa kan tlawh dawn,

A theih loh, kir leh nghal rawh u.

Ka vai tawng thiamin a daih tawh lo, "Ka thianpa in a hnathawh hmuhpui turin min duh alawm, Canteen pawh dawr kan duh, zanin-ah camp-a riah kan tum" han tih kual vel tum sateh mah ila, min chhuah a tum loh hmel kher mai, “In turn rawh u” a ti sek mai lehnghal.

Rang lutukin ka mobile phone ka phawrh chhuak a,

Thianpa, hei min dang tlat mai,

I phone kha han chelhtir teh.

Rang lutukin duty pa chu ka pe a

Yes sir, sir, ha ji sir.

Ka thianpa chu a va Sir nasa tehreng em, a lo lal hle a nih ngei hi. An inbe zo chiah chu gate a hawng rawk rawk mai maw le.

Mahse Gatepui a lo la awm cheu, kan va thlen chuan mite chuan Gate pass emawni hi an show a, an kal thei bik a, keini erawh chu ka thianpa bak gate pass kan nei si lo. Ka phone leh a, “Min lo nghak ru, ka rawn kal ang” a tih avangin kan lo nghak ta ngawt a. A thuam famkim nen khawng lutukin a lo kal a, kan Motor number a en vung vung a, Office lamah min luhsan ta daih a, a rawn chhuak leh chu Gatepui an hawng leh ta ruau ruau mai le. Sipai thian neih chu nuam deuh asin.

An khawsakna lah Sipai hmun tih takah, hawina lam apiang hi a mawi a ni ber e. Indo laia India in Pakistan ralthuam an mansak te kha, Camp chei mawi nan an hmang mai mai a Keini lahin thlalakpui lam ringawt kan ngaihtuah a, kan la mawlh mawlh mai a ni.

Chuti taka luh harsa leh buaithlak a nih hre hawt lova kal kha kan ni a. Kan kalna tur hian nimin lamah nileng deuhthawin a lo buaipui tawh. Naktuka kan thil enna tur Card pawh harsa taka a buaipui a nih thu a nupui hnen atangin kan hre chauh. Tihtakzetin min lo sawm a lo ni.

Zan dar 12 thleng kan inkawm a, kan inkawm chhung zawngin, a Tiang hmawr Dar a hru tle heuh heuh mai a, a Sipai Boot pawh a hnuai thir ngat kha a nawt tle teh asin.

Riahna sawn vang nge ka muhil tha thei lova, zing dar 5 ah ka harh hlawl mai a, ka han tho chu, choka lamah ri ka hria, ka han hawi phei a, ka thianpa chuan Thingpui a lo lum hmin der tawh. Dar 4 ah khan a lo tho der tawh chu niin. Sipai hi zawng Sipai an lo ni e.

Zing dar 7 atangin kan hmuhnawm chu an chhuah tan dawn avangin, ka thianpa chuan min kalsan nghal a, keini pawh hmanhmawh takin kan insiam sawk sawk a, inthlahrung takin kil khatah kan va inzep ve a. Kan thu fel chiah tih chuan, ka thiapa chu Field thlang lam atang chuan khawng lutukin a lo chho vah vah a, an hotuten an ko nge, Programme an tan dawn tawh ? A lo kal zel a, kan lam a rawn pan ta zel mai, engtizia nge ? “ Lo kal rawh u helamah” a ti a. VIP thutna lamah min hruai phei ta diah diah mai a, kan bula thute khan min thlir thup mai a, intithei takin kan kalsan ta a nih kha.Sipai lal zirtirtupa thian kan nei miau alawm.

Kan hmuhnawm en chu hei hi a ni. National Defence Academy 118^th Batch Passing out Parade. Mi 317 zingah Mizo pakhatmah an awm ve lo erawh chuan rual awh a tina duh kher mai.

Ka thianpa hming ka la sawi lo tak e. Amah chu amah chu ....Lalzarzova NDA Drill Instructor , Pawlrang khaw chhuak ngat maw le.