KA SIPAI THIAN

Chuti taka inthian tha pawh kan ni lo, hnam dang zingah, ka Mizopui lo awm ve ta chu, eng emaw ti tiin kan inchhar nawlh mai a. Amah chuan bel khat pawh a la bel lo, mahse a lal em em si. Amah aia rank sarih vela lal turte hrual vel tu a ni.

A pu turte hrual vel tu mah nise, a lal lai chuan lal tak a ni. Englaipawhin a hrualte chu a hmaah khawng taka an kal loh chuan punishment a pe hmiah thin. A zirtirna hmunah phalna la lova vawi 3 ngawt an absent chuan, Army Officer lian tak ni tur kha a hnawt chhuak hmiah thei bawk.

A hnathawh ropui tak inlar chhuah ni a thleng ta, hmuhpui ve ngei turin min chah a. Thil ropui vak a nih ka beisei lem lo, mahse Canteen dawr a remchan dawn avangin min sawmna chu phur hmel zetin, “Kan lo kal ngei ngei ang” kan ti a. Kan kal ta a.

Rin ang ngawt a lo ni lo, an Camp peng kan thleng chiah tihin Police-in min lo check nghal pang a, Kan Motor numberte an note fel hnuah min kaltir ve leh mai bawk a, Camp kan thlen tepin Sipaiin min lo dang leh.

Khawnge in kal dawn?,

Kan thianpa kan tlawh dawn,

A theih loh, kir leh nghal rawh u.

Ka vai tawng thiamin a daih tawh lo, "Ka thianpa in a hnathawh hmuhpui turin min duh alawm, Canteen pawh dawr kan duh, zanin-ah camp-a riah kan tum" han tih kual vel tum sateh mah ila, min chhuah a tum loh hmel kher mai, “In turn rawh u” a ti sek mai lehnghal.

Rang lutukin ka mobile phone ka phawrh chhuak a,

Thianpa, hei min dang tlat mai,

I phone kha han chelhtir teh.

Rang lutukin duty pa chu ka pe a

Yes sir, sir, ha ji sir.

Ka thianpa chu a va Sir nasa tehreng em, a lo lal hle a nih ngei hi. An inbe zo chiah chu gate a hawng rawk rawk mai maw le.

Mahse Gatepui a lo la awm cheu, kan va thlen chuan mite chuan Gate pass emawni hi an show a, an kal thei bik a, keini erawh chu ka thianpa bak gate pass kan nei si lo. Ka phone leh a, “Min lo nghak ru, ka rawn kal ang” a tih avangin kan lo nghak ta ngawt a. A thuam famkim nen khawng lutukin a lo kal a, kan Motor number a en vung vung a, Office lamah min luhsan ta daih a, a rawn chhuak leh chu Gatepui an hawng leh ta ruau ruau mai le. Sipai thian neih chu nuam deuh asin.

An khawsakna lah Sipai hmun tih takah, hawina lam apiang hi a mawi a ni ber e. Indo laia India in Pakistan ralthuam an mansak te kha, Camp chei mawi nan an hmang mai mai a Keini lahin thlalakpui lam ringawt kan ngaihtuah a, kan la mawlh mawlh mai a ni.

Chuti taka luh harsa leh buaithlak a nih hre hawt lova kal kha kan ni a. Kan kalna tur hian nimin lamah nileng deuhthawin a lo buaipui tawh. Naktuka kan thil enna tur Card pawh harsa taka a buaipui a nih thu a nupui hnen atangin kan hre chauh. Tihtakzetin min lo sawm a lo ni.

Zan dar 12 thleng kan inkawm a, kan inkawm chhung zawngin, a Tiang hmawr Dar a hru tle heuh heuh mai a, a Sipai Boot pawh a hnuai thir ngat kha a nawt tle teh asin.

Riahna sawn vang nge ka muhil tha thei lova, zing dar 5 ah ka harh hlawl mai a, ka han tho chu, choka lamah ri ka hria, ka han hawi phei a, ka thianpa chuan Thingpui a lo lum hmin der tawh. Dar 4 ah khan a lo tho der tawh chu niin. Sipai hi zawng Sipai an lo ni e.

Zing dar 7 atangin kan hmuhnawm chu an chhuah tan dawn avangin, ka thianpa chuan min kalsan nghal a, keini pawh hmanhmawh takin kan insiam sawk sawk a, inthlahrung takin kil khatah kan va inzep ve a. Kan thu fel chiah tih chuan, ka thiapa chu Field thlang lam atang chuan khawng lutukin a lo chho vah vah a, an hotuten an ko nge, Programme an tan dawn tawh ? A lo kal zel a, kan lam a rawn pan ta zel mai, engtizia nge ? “ Lo kal rawh u helamah” a ti a. VIP thutna lamah min hruai phei ta diah diah mai a, kan bula thute khan min thlir thup mai a, intithei takin kan kalsan ta a nih kha.Sipai lal zirtirtupa thian kan nei miau alawm.

Kan hmuhnawm en chu hei hi a ni. National Defence Academy 118^th Batch Passing out Parade. Mi 317 zingah Mizo pakhatmah an awm ve lo erawh chuan rual awh a tina duh kher mai.

Ka thianpa hming ka la sawi lo tak e. Amah chu amah chu ....Lalzarzova NDA Drill Instructor , Pawlrang khaw chhuak ngat maw le.

I INHRE CHIANG EM ?

“Ni khatah Kuva Rs.50/- man ka ei thin” tia, i ram zim tak, sawrbawl em em lehnghal a, inti thawveng tak a, ha sen sunga i then nawi lai khan, i ropui loh zia i ngaihtuah chhuak ve thin thovem?

I Vai hmuhsit ve ringawtte lah, Aizawl Vai Mutria maltlat bâk i ngam lo. “Bagha Vai ka hlau lo” tiin ralkhat-ah i inhrosa sûrh sûrh a, Bagha i thleng thla chiah a, mei khup zûlin i hawi hruk hruk a ni lawm ni.

“Cheraw dance, World Record ka siam” i ti a, Minister hova in Hallelui tuar tuar lai khan, ralkhat-ah TV-ah kan lo thlir ve che a, mipui tlim hmur kâra i meizial zûk khûk vung vungte kha a langsar teh asin. Mi ramah chuan a langin meizialte hi a zu pût pût tawh lo, nang lah chuan Bus chhûng-ah pawh, ka zial zûk avang hian mi an rui ang tih ngaihtuah duh miah lovin i zu khu vung vung reng mai si a.

A seh hlumtu ang maia i nui sen sûng reng ringawt pawh hi Mizo hmêl ti bâltu i ni tih lah i ngaihtuah duh der si lo.

I khawpui Aizawl i chhuan ve êm êmte hi han en teh mah, Kawng zîm lutuk avanga, kea kal chak zâwk châng awmna khawpui hi, mi khawpui kalkawngte chu a zau mai ni lo, hmuhnawm khawp hian a ropui asin.

Aizawl khawpui kawng chu

New York khawpui khawng

Beijing khawpui kawng

Tokyo khawpui kawng

I khawpui-ah chuan, kham pangah In a rah fir fer a, tuihawk pawhin luan ngaihna hre lo lekin, a khat thei ang berin In i sa khat tlat tawh mai si a, engti khawng mahin i chei mawi thei tawh lovang. Mite chuan mahni te tea In sa lovin, an thenawm khawvengte nen society siamin, Builder an saktir a, a ram neitu chanvo bakah Builder chanvo tur engemawzat an sihchhuah a. Inchhawng mawi tak tak, thlir vawng vawng pawha thlir ninawm loh tur an sa a, hmun zim te pawh nuam takin, society nuam tak din thei khawpin, an khawpui an rem thin asin.

Pune

Imphal Langol

Singapore

Infiamna lamah thangtharte chhawr tur hmun tha reng reng tun thlengin ila nei lo, i khelmual neih len berte lah Assam Rifle ta i hman hawh, eng emaw changa i mamawh huna an pek phal loh che a la ni lehnghal. I thenawm lawk Imphal khelmualte hi han en teh. An kawngpuite pawh i khawpui kawng ai chuan a chhuanawm khawp asin.

Aizawl Lammual

Imphal khuman lampak

Imphal khawpui kawng

Cheng nuai hnih khat vel lek Capital neiin Dâwr i hawng ve a, dâwr lah chu i har êm êm lehnghâl, “Min hniam thei ang em?” an ti dêk dêk a. “Theih loh” i ti bûl hmuk a. Mite chuan vaibelchhe têl hmangin dawr an kai a, nawrlirh nên duh duh thlan zung zung theih tur an rem tuarh pawhin, nui sangin anmahni dâwr tute a an lo lâwm thin asin.
Chutichuan, khawvel thilah heti khawpa inchhuanga, induh tur i awm lo chung hian, chhuan tur pakhat chiah i nei, chu chu NUNNA KAWNG kawhhmuh theitu i nihna kha a ni e.

KA LEHKHABU KHA

Ka lehkhabu chhuah chungchang April thlaa ka pho lan tawh kha, rin loh tak maiin, upain “Hnung lama sa barh” a tih ang chi deuh roh hian, thil mak tak mai ka dawng thut mai a.

Nikum hmasa khan ka lehkhabu hmasa zawk BIHCHIANNA kha Mizoram State Library-ah min leisak ve turin ka zawrh a, mahse chhanna reng reng ka dawng lo. Beiseina tinther tiat pawh ka neih tawh loh hnuah, thla hmasa mai khan, “I lehkhabu kan lo lei ang e, tun thla chhung hun kan pe ang che” tiin min rawn phone thut a. Ka buai zo ta, print sa engmah ka nei tawh si lo, copies 434 lai an mamawh si, ka awmna lah hlate khua daih a ni tawh. Phone ka dawn tirh chuan, ni 15 chhung leka chutiang han buatsaih chu a kawng awmin ka hre lo, ka thin hi a rim tuk mai zawk a, mahse khawvel changkanga khawsa kan nih ka theihnghilh thut vang a ni. Ka han inngaihtuah thar leh a, ka lehkhabu kha soft copy, pen drive-ah ka lo la dah ran mai tih ka hre chhuak a. Chu pen drive chu speed post-a Aizawla thawn tur em ni ang tih ka ngaihtuah laiin, a aia chak zawk ka ngaihtuah chhuak leh ta, Internet lamah a thawn theih ka ring leh ta zawk a. Ka thiante Computer thiam ka rawn a, a theih tih min hrilh avangin beiseina sang tak ka nei leh thei ta.

Mahse ka thawn ve thiam tak tak ang em ? min hrilh dan chuan, “ I lehkhabu chhut sa chu ZIP-ah dah phawt la, 10 MB aia a tet chuan ZIP-a dah pawh a tul lo maithei, gmail-ah chuan a thawn theih ngei ang” tih a ni. ZIP chu engnge? Hmanah chuan ka hmet chhuak tawh, khawiah nge a awm ka hre tawh lo, ZIP ngai lo ta se engtinnge ka thawn ang, mail-a ka thawn thin vete lah phek khat lek lekte a ni si a, a bu-a thawn chu ka huphurh ngei mai. Chuvangin puitu ka zawng a, kan nau Cobtea ka ruai ta. A hmet chhuak zeuh zeuh a, ZIP-ah chuan a thun a, attach file hmangin a thawn ta et a. Ka lo huphurh lawk tehreng nen, ka huphurh ang he hu chu a ni lo, keimah phawh khan lo try ta ila, ka thawn ve theih tho chu ka ring leh hnuhnawh a. Mahse ka lawm lutuk Cobte.

Ka lehkhabu reprint chu.

A kawm hnung lamah heng thu lawilo tak tak hi ka dah bawk.

Ka mail chu Aizawl-a kan nau Itea’n min lo phawrh chhuahsak a, Press nei hmelhriat a lo nei leh zel a, kar hnih chhung lekin min print zawhsak ta mai a, a hlep lah a tha phian lehnghal, chuvangin ui miah lovin kannu pawnfen thar 2 ngawt ka leisak asin le.Nupuite pawnfen leisak hi pa duap deuh chuan an ching an ti. Kei chu ka ching lo, ka vawikhat leisakna, ka duap ve tan a ni maithei.

Nû Pawnfên hian dinhmun ropui tak a luah, fate’n hlauh an neih a, an tlanchhiat apiangin, nû pawnfen an vawn tawh chuan, engmah hi an hlau tawh lo. Chuvangin, an tân thlamuanna kulhpui a ni. Tin, fate hnap tawlh hrûk fai nân a remchâng bawk . Chu chang a ni lo, sum neih tawh loh lamah, nu berin a pawnfên chhûng a zen ruk ruk a, chêng zahnih khat hi rawn phawrh chhuah tûr a nei leh hlauh thin. Kan chhungkaw pawisa dah thatna a lo ni lehzêl tihte ka hriat chhuah thar avângin, ui lovin a dawbawl bawlin ka lei ta mai a ni.