KA KHÛR LÂWK DEUH: Râl khata ka lo hriat danin, Mumbai Mizoram House chu natna ṭihbaiawm nia kan ngaih, Cancer veite thlen khâwmna a ni. Chuvângchuan, thi mai tûra inngai, lungngai tak ṭhu kun tlawk tlawkte ka zuk hmu tûr chu ka ṭim lâwk deuh a ni.
Tlai chaw ei hun dâwn ruaiah ka thleng thla a, chaw ei tûra dam lo lokal khâwmte chu ka han en vêl a, damdawi nghawng avânga, lu kawlh, nula te, naupang te, puitling te ka hmu nghal pang mai, kaw chhung aṭanga an siak chhuah, plastic bâwm pai nal nal pawh an kat nawk bawk.
KA RIN A ANG LO: Ka suangtuah lâwk ang rêng rêng a ni ta lo, dam lo chaw ei tûra lokal khâwmte chu, an ngui nghiai lo tawp mai, nui sângin chaw an dawh a, fiamthu thawhin an nui uarh uarh ta mai. Kei, a na lo ber kha, ka na ta ber zawk ni te hian ka hria a, ka tum loh thil ka tawng nghal phawt.
HOUSE DANGDAI: He House hi hmun danga Mizoram House nên a inang lo, dam lo lalna In a ni, Ei leh in anmahniin an control vek, Mizoram sorkar in cook a ruai nachungin, Chaw leh Dal bâk an siam ngai lo, a bâk zawng chu damlo awmpui tute siam a ni. Mizo chawhmeh siam tur a awm reng a ni mai, dam lo lokal apiangten, Mizoram aṭangin Rawtuai te, Vawksa rêp te, Ṭamkawr te, Behlawi te, an rawn keng ṭhin a, dam lo ni lêm lo tân pawh, Mizoram aṭanga he House-a thlen tum tân chuan bengvâr chhuah a, Mizo chawhmeh ken ṭhin a ṭha ngawt ang.
Dam lote hian committee indinin inrelbawlna fel tak an siam thlap a, an minute-a thu chuang tam ber erawh chu, secretary inthlak chungchang a ni deuh mai. Zan tin Pathian biak inkhawm a awm ziah a, hei hi thlarau lam malsawm dawnna hnâr a ni.
A VA HLU ÊM: He House neih rawt chhuak tu hi ngalfimin dam rawh se. Dam lote hi hun rei tak tak cham ngai an nih ṭhin avangin, he House hi awm lo sela chaun, sum an sen tawh hmun thuma ṭhena hmun khat chu an sen belh a ngai hial ang.
Dam lo lo tanpui tûr Mizoram sorkarin Vai Kristian fel tak mai a rawih sak bawk a. Hêngte tak hi a hlut lehzualna a ni. Hetiang hi State dangte chuan an nei ve lo a ni ang, hmanah Imphal-a kan awm laiin Meitei ringthar pakhat chu, he Mumbai Tata Hospital-ah hian dam lo tanpuia inhlawhin a awm bo vang vang a, a nupui fanau chawm nan sum tam tak a rawn hawn ṭhin. Chu chu tun thlengin eizawn nân a la hmang niin ka hria. Hetiang mi hi dam lote hian an mamawh reng lah taka, puitu nei lo ta se, enkawlna dawng mai thei lovin, ṭhenkhat chu chhan hman lohva awm ta a awm theih hial âwm e.
Dik tak chuan Cancer natna hi thih thuai thuaina tur natna ni maia ngaih tlânglâwn a ni.
Chuvângchuan, natna ṭihbaiawm niah kan ngai. Miin cancer natna a vei tih a inhriat veleh a rilru a chau nghâl a, a kâah engmah a tui tawh thin lo. Chu rilru khawngaihthlak tak nên chuan ngui nghiaiin Mizoram aṭangin an lokal a. He House an rawn thlen a, khar hnih vêl an châm tawh chuan, an rilru nguina chu paih bovin a awm thin ni berin a lang. Hei hi he House ṭangkai lehzualna a ni.
MIZO DOCTOR KAN RÊL: Zan inkhâwm bân apiangin inkawm hona kan nei ṭhin, kan titinaa kan tuipui ber chu an natna chungchâng sawi a ni. Chu chuan hun rei tak sawi a daih lêm lo, dik tak chuan han inkawm ho fo hi chuan mi rêl hi kan agenda pakhat a ni duh khawp mai a. Zoram chhiatna chungchang ka sawi a, kan duh duh kan rêl a. Politician te, Kohhran hruaitu te, Sorkar Officer te thlengin, nuam ve tak a ni.
Natna avanga kal khawm kan ni bawk a, kan rêlte zingah Mizo Doctorte pawh an tel nawk mai, an thiltih ṭhat tamtak kalkanin an mi enkawl dân kan duhtâwk loh laite kan sawi khâwm bawk a, han sawi chhuah tâkah chuan, chu pawh chu pawh, tih tur a lo awm nual mai. Dam lo pakhat chuan Aizawlah khan Antibiotic min pe rei lutuk a, ka Lung a lo chhe ṭêp alâwm, heta kan Doctor chuan, “Tunlaiah chutiang chen chen Antibiotic an inpe tawh ngai hlei nem” a ti asin, tihte a sawi chhuak a. Thenkhat pawhin, damdawi en chin nân min hmang rei lutuk a, kan chhiat zawh phah a nih hi, ti ta lâwng lâwng pawh an awm.
Damdawi pêk chungchang hi kei pawhin sawi chhuah tur ka lo nei ve, hetiang hian ka share ve a. Ka pa kha, TB tê chi a ni, ti siin damdawi chak lutukin nitin vawi hnih Injection tûr, ni khat pawh âwl chuan, a bul aṭanga ṭan ṭhat leh tûr, tih kha kan thupek dawn a ni, vawi 90 lai injection a ngaih avângin, chauhpui hlê mah se kan chhunzawm zêl a, vawi 20 kan jection meuh chuan a aw bâwm thlengin a khawih chhe ta, engmah a ei thei lo, kan mangang lutukin kan Pu Doctor chu kan râwn leh a, “Chuti chu a mûm-in thlâk mai ang” a ti awlsam leh êt si. Mahse ka pa chuan kha damdawi chak lutuk kha a chhiatpui hlen ta niin a lang. A rawn harh chhuah hnua Imphal Doctor kan râwn ṭumin, “Ëngtizia nge chutiang damdawite tunlaiah an la hman?” a ti tlat a ni. Velore Doctor pawhin “In damdawi enkawlna hmasain a chuap a ti chhe nual tawh” an lo ti ve leh bawk. Chutichuan, ka pa kha damna dawi nia kan ngaih hmangin, a lei zin kawng kan tih tawi phah ta nia ka ngaih thu tui takin ka sawipui a, min Amen-pui khawp mai.
