Ka nausein tunge mi chawi ?Ka nu, ka nu duhtak chu.
Ka dam lohvin tunge mi chawi ?
Ka nu, ka nu duhtak chu.
Ka dam lova, a tlaivara, min lo chawi mu thin,
Hah takin, chak lo chung pawhin,
Ka nu, ka nu duhtak chu.
Ka nu, kan naupan laiin a chunga mi khi min zirtir thrîn tiraw ? A rei ta êm a ka theihnghilh thren tawh, nang chuan i la hre chhuak vekin ka ring. Âw… i bulah awm ila sawi dûn leh ila ka va châk êm.
Mahse, tunah erawh trûlna avângin ram hla takah ka awmbosan tawh si che a, nang lah hrisêl lohna hrang hrangin a tlâkbuak avâng chein, i chanchin, thin ti thrâwng tak takin min dêng leh thut thrin, tunah pawh he lehkha hi chhiar turin, i mit a fiah tâwk lovin, i taksa chaknain a tlin tawh loh ka ring, mahse nangmah hmangaiha thlahlel ngawih ngawih tu che, ka ûnaute, i natna khum kotlânga thrûte kha lo chhiar tir la, nangmah ka ngaihtuah chânga ka rilrua khêl lova lo lang nghâl uaih uaih thrin hi ka lo hrilh ang che, i bulah ka awm ve thei si lova, he lehkha hi i bula ka titi ve teihna awmchhun a nih tâk avângin dawhthei takin lo ngaithla ang che aw.
Entehmaw ka nu, tuna ka awmna hi a ropui khawp mai a, kan pi leh pûte pialrâl beiseih ai pawhin a pui zâwk hialin ka ring, Chutih laia ka rilrua lo lang nghâl chu, ka pian hmaa kan ram retheih zia leh, Mautâm trâm a tlâk avânga, Zofaten ei tûr nei lova, Ram Bahra khur laia, ei tûr dapa an vah nasat ziate, Chu trâm tuar manganna avânga Trâm Do Pâwl ding khân, hnam chhan duhna a hring chhuak a. Chuvângchuan, Helnaah an luh phah ta a nih kha. Kha helna avang khan dimdawihna awm miah lovin Sipai khân an sawisa che u a, Ka pu In sak ropui tak pawh kha an hâlsak che u a ni lâwm ni kha ? Chutichuan, khaw chhûngah pawh awm thei lovin, Lo lamah in tlân chhe vawn vawn a nih kha.
Khatih lai khân i pum chhûnga ka la awm lai a ni. Ka nu, tun hnuah hian ka ngaihtuah lêt a, khatih laia i manganna kha thisen-ah min kai a ni ka ti lo thei lo, a mak lutuk, eng Dân mah bawhchhe lova ka awm lai pawh hian, Sipai Uniform ha ka hmuh ringawt pawh hian ka ti ril a la khûr ziah thrin asin.
Kan ram retheihna ngai pawimawh lova, Buhfai aia Bomb thlâk duhtu sorkar kha ka huat a zual thrin. Mahse ka nu, Hnam thuthlung lam chu ka vei angin i vei phâk ve tawh lovang, chuvangin chu lam chu ka sawpui duah lo mai ang che, i tâna thu ngaihnawm chu nang nêna kan inkâr a ni tiraw, chu lam thu chu ka sawipui zêl ang che aw.
Ka pa nên khan, kan nawmna tûr ngaihtuaha, hahthikûla, kâwla ni chhuak chhiara, ram Lo in feh thrin zia ka ngaihtuah châng pawh hian, a chângin ka lung a lêng a, a chângin ka thin a rim leh ringawt thrin, a chhan chu maw, mite khawsak nawm bik zia ka hmuh hian a ni. Tûna he lehkha ka ziah lai pawh hian, ka hmuh phâk maiah, kan themawnte chuan leilet tha lutuk an nei a, In atanga ban phâk lekah Buh leh thlai thra lutuk an thar chhuak thei bik a.
Nangni chuan chil chhâk phâk in tihte kha, chawhma kal te a ni a, a châng chuan nilêng deuhthaw kalahte khân Lo in neih thrin kha, In lo a hlat thrin êm avângin in Buh thar chhuah pawh, kan Khua leh Lo inkâr lai takah, Chhêkin sain in thiar ngat ngat a. Buh in thar chhuah tam châng phei chuan a kum leh Lo vah hun thlenga phurh thlen zawh loh chângte in nei thrin tiraw ? Khatih lai khân, Thawhtan niah Lo-ah min riahsan a, Inrinni-ah Pathianni serh turin in lo haw leh thrin a nih kha.
Ka nu, in Pathianni serh uluk theih zia pawh kha, tûnlai thangthar tân hian zir tham a va tling êm. Zîng dâr kua atanga zân dâr kua thleng kha chu, tui chawi, insûk, inbual thlengin, eirawngbâwl tih chauh loh chu, hna dang rêng rêng thawk lovin Pathian biak nân in hmang thrîn kha a ni a. Tûnah lah chawlhni bawhchhiat rêng a awm thei tawh lo.
Ka nu, Inrinni tlai in feh haw kan lo hmuah thrin che u kha ka mitthlâah a la châm reng a sin. Fanghmâ min rawn hawn dâwn tih hre rengin, kha Fanghma kha ah châkin, ka pa Iptepui min thruisak ngei mai kha ak chhuakin, kawng lakah kan rawn chhâwk thrin che u a nih kha, In ram riak lo haw lo hmuah che u kha a nuam thrin, mi nu leh pate kan tawh zut zut hnuah kan han inhmu ve thrîn kha chu a hlimawm thrîn tiraw.
Thil dangah pakai leh tawh ang sawi tûr ka ngah si, lo ngithla zel rawh aw. Tûna kan awmnaah hian Kohhran hrang hrang leh Biakin ropui tak tak a tam khawp mai a, mahse maw ka nu, inkhâwm tûr mumal pawh zuk awm thrîn lova maw le‼ an inkhâwmte lah chu, an ri che che chauh mai a, hetih lai hian ka rilrua lo lang nghâl chu, kan Kohhran-in Harhna kan chan laite kha a ni. Kha harhna avâng khân nang mi zakzum tak thrîn kha harhna khân a thrâwng tho ve che a, Biakin inkhâwm trantu nih pawh zak thrin khân, zahna awm hauh lovin Maichâm hmâah inzo taka i lâm laite kha a ngaihawm ta ti raw, tûnah lah pên khat pawh pên chhuak turin i ke a rit lutuk a ni si a.
Kha harhna kha chan ve tumin lâmtualah, khurh lâm chang ho zîngah ka luh ve pawh khân, kei ve chu ka lâm khawng ut reng ringawt mai kha a ni a, duh duha chan ngawt theih pawh a lo ni lo, threnkhat duh lo chung chunga chang tlat an awm lawi si. Hmânah hmânah, Harhna hmasa chang te zingah, Utrawk sawta sawt thrîn an awm a, Vai pakhat hian mak tiin Biakin kawngka atangin a lo thlîr a, chu harhna chuan a nuai ve ta thut mai a, “Het het, Mizo Pathian a tha lo” ti chung zelin Biakin chhûng lamah a sawt lût e an tih chu mawle.Thil mak ve tawk zawng ani.
Ka ngaihtuah zêl a kha harhna kha Kohhran Upa threnkhat, harhna hre thiam lo khan, fîm taka kalpui tumin an khak fak fak che u a, hlim hla kan sak kham loh leh in lâmpui nin theih lohte kha thlang duh lovin, solfa hla un pui maite kha an han thlang lui thrîn kha a ni a, a buaithlak thrîn ngawt mai tiraw. Kha harhna kha Kohhran thranna bulpui a nih nasatzia tunah hian ka hre zual deuh deuh mai ka ti. Harhna chang ve lo Kohhran ka hmuh hian, kan Kohhran kha ka ngai thrîn. Chutih rualin nang ka ngaih che a zual bawk.
Helam leh kha lam ti ang main thil pakhat ka’n zep tel leh lawk. Tûna kan kawmthlang lawkah hian Dawr lian zet mai chhâwng li laia sâng, duh duh thlan theihna ni âwm hiala thil chikim zawrhna. Thuamhnaw, bungrua, khâwl lam thil, Thlai hring leh ro chena thlan tûr awmnaah, mâwi lutuka an rem lai, kan duh duh kan pawt thla a, nawrlirhin ka nawr kual zung zung mai a. Thil lei a awlsam teh asin. Chutih laia ka rilrua lo lang thrîn chu, kum 10 mi lek ka nih laia, Silchar Vai hovin Lawnglêng hmanga an rawn tawlh chhoh, Tuirial phaikuama Thingrem lei tura ke ngata min kalpui kha a ni. I la hre ve reng em ka nu ? Zîngkârah kan chhuak a, kawng lakah chawfûn kan ei a, khaw thim hnuah In kan thleng leh chauh a nih kha. Haw kawnga ka tuihâl lutukin, Mau tui pai zawnga, Mau ka sah chhoh zak zak lai te, Tui kan hmuh lawk loh avanga Changel Tui min fehtirte pawh kha ka la theihnghilh lo asin.
Kan hun kal tawha i thiltih ka mitthlaa lo lang leh thut thrîn chu, Mizorama Buhfai uih kan dawn lai kha a ni, kha Buhfai dum mum hêl hûl, hânna nei miah lo kha, keini naupang ho chuan kan ei thei lova, Atra min siamsak thrîn a nih kha, Atra lah kha, kan mawmna tur Têl kan nei si lova, ur ro ringawt kha chu kan ei ning a, Mizo Chhangban chhuma min chhumsak leh ringawt thrinte kha mitthlaah a la châm reng mai ka ti.
Khatih lai khân, Ka pu Mâma’n Aizawl atangin Buhfai a rawn supply hlauh mai a, Kan Inah khân Buhfai bag kan rem ta ul mai. Ka pu Mâma khân thingtlâng chawhmeh kha a ei ve nawk nawk thiam si lova, Vawksa zuar awm laiin a lei teuhva, kan rapchungah khân i rêpsak dul kha, keini naupang ho tân khân chil ti puttu a lo ni a, meilum kan ai chânga kha Vawksa rep pawhthlâk tuma kan ban dêk dêk apiang khân, “ Khawih suh u, i pu ta a nih kha” tia min khap trinte kha i theihnghilh daih tawh ang tiraw.
Ka nu, nangmah ka ngaihtuah chânga ka rilrua lo lang ziah dang leh chu, ka nupui neih dâwna min lawmpui tura in lokal truma, Thlawhna Ticket confirm loh nena Airport in pan i sawi chhuah kha, kha thu kha Pathian thu ka sawi chângte hian ka la telh fo thrîn asin. A ni ngawt mai ti raw, Thlawhna ticket confirm neite chuan, lungmuang takin Thlawhna an lo nghâk a, nangni chuan ticket confirm loh in neih avângin, thaw dêp dêpin, kan inneihnaa tel ve theih loh hlau rêng rêng khân, kha terminal building-ah khân in awm a ni si a. Vanram kalna kawngah pawh hian ticket confirm loh nêna kal tum chu a buaithlâk ngawt ang ti raw.
Sawi tûr ka la ngah lutuk, mahse i chau lutuk ang e, mu hahchâwl tawh mai rawh. Taksaa kan inhmuh leh theih nân ka tawngtai thrîn, kan inhmuh leh ngei pawh ka ring, hmânnia i natna avanga, mumal lo zeta i tawng thin zia ka unauten min hrilh hnu khan, hei, rin loh takin i lo harh chhuak leh a, nichin lawka phone-a kan inbiak pawh khân, i trawng a la fiah thra lutuk. Thu awmze nei takte chu i la sawi lehnghâl. “Harsatna kan tuarte hi Pathian remruat a ni thrîn” i la ti hrâm hrâm thei a. Mahse ka nu, harsatnaah pawh thihna êm hi chu thleng lo se ka duh thrîn, i chungah lek phei chuan la thleng lo se ka duh lehzual.
Kan duhthusâm hi Pathian duhzâwng a nih lohva, taksaa kan inhmu thei tawh lo a nih pawhin, heihi erawh ka tiam ang che. Vanram kawtchhuahah min lo nghâk la, kei chuan ticket confirm nên ngeia nangmah tawng tûrin, tûna ka lei nun hi ‘Krista nên’ hman ka lo tum zel dâwn nia.
Mahse, tunah erawh trûlna avângin ram hla takah ka awmbosan tawh si che a, nang lah hrisêl lohna hrang hrangin a tlâkbuak avâng chein, i chanchin, thin ti thrâwng tak takin min dêng leh thut thrin, tunah pawh he lehkha hi chhiar turin, i mit a fiah tâwk lovin, i taksa chaknain a tlin tawh loh ka ring, mahse nangmah hmangaiha thlahlel ngawih ngawih tu che, ka ûnaute, i natna khum kotlânga thrûte kha lo chhiar tir la, nangmah ka ngaihtuah chânga ka rilrua khêl lova lo lang nghâl uaih uaih thrin hi ka lo hrilh ang che, i bulah ka awm ve thei si lova, he lehkha hi i bula ka titi ve teihna awmchhun a nih tâk avângin dawhthei takin lo ngaithla ang che aw.
Entehmaw ka nu, tuna ka awmna hi a ropui khawp mai a, kan pi leh pûte pialrâl beiseih ai pawhin a pui zâwk hialin ka ring, Chutih laia ka rilrua lo lang nghâl chu, ka pian hmaa kan ram retheih zia leh, Mautâm trâm a tlâk avânga, Zofaten ei tûr nei lova, Ram Bahra khur laia, ei tûr dapa an vah nasat ziate, Chu trâm tuar manganna avânga Trâm Do Pâwl ding khân, hnam chhan duhna a hring chhuak a. Chuvângchuan, Helnaah an luh phah ta a nih kha. Kha helna avang khan dimdawihna awm miah lovin Sipai khân an sawisa che u a, Ka pu In sak ropui tak pawh kha an hâlsak che u a ni lâwm ni kha ? Chutichuan, khaw chhûngah pawh awm thei lovin, Lo lamah in tlân chhe vawn vawn a nih kha.
Khatih lai khân i pum chhûnga ka la awm lai a ni. Ka nu, tun hnuah hian ka ngaihtuah lêt a, khatih laia i manganna kha thisen-ah min kai a ni ka ti lo thei lo, a mak lutuk, eng Dân mah bawhchhe lova ka awm lai pawh hian, Sipai Uniform ha ka hmuh ringawt pawh hian ka ti ril a la khûr ziah thrin asin.
Kan ram retheihna ngai pawimawh lova, Buhfai aia Bomb thlâk duhtu sorkar kha ka huat a zual thrin. Mahse ka nu, Hnam thuthlung lam chu ka vei angin i vei phâk ve tawh lovang, chuvangin chu lam chu ka sawpui duah lo mai ang che, i tâna thu ngaihnawm chu nang nêna kan inkâr a ni tiraw, chu lam thu chu ka sawipui zêl ang che aw.
Ka pa nên khan, kan nawmna tûr ngaihtuaha, hahthikûla, kâwla ni chhuak chhiara, ram Lo in feh thrin zia ka ngaihtuah châng pawh hian, a chângin ka lung a lêng a, a chângin ka thin a rim leh ringawt thrin, a chhan chu maw, mite khawsak nawm bik zia ka hmuh hian a ni. Tûna he lehkha ka ziah lai pawh hian, ka hmuh phâk maiah, kan themawnte chuan leilet tha lutuk an nei a, In atanga ban phâk lekah Buh leh thlai thra lutuk an thar chhuak thei bik a.
Nangni chuan chil chhâk phâk in tihte kha, chawhma kal te a ni a, a châng chuan nilêng deuhthaw kalahte khân Lo in neih thrin kha, In lo a hlat thrin êm avângin in Buh thar chhuah pawh, kan Khua leh Lo inkâr lai takah, Chhêkin sain in thiar ngat ngat a. Buh in thar chhuah tam châng phei chuan a kum leh Lo vah hun thlenga phurh thlen zawh loh chângte in nei thrin tiraw ? Khatih lai khân, Thawhtan niah Lo-ah min riahsan a, Inrinni-ah Pathianni serh turin in lo haw leh thrin a nih kha.
Ka nu, in Pathianni serh uluk theih zia pawh kha, tûnlai thangthar tân hian zir tham a va tling êm. Zîng dâr kua atanga zân dâr kua thleng kha chu, tui chawi, insûk, inbual thlengin, eirawngbâwl tih chauh loh chu, hna dang rêng rêng thawk lovin Pathian biak nân in hmang thrîn kha a ni a. Tûnah lah chawlhni bawhchhiat rêng a awm thei tawh lo.
Ka nu, Inrinni tlai in feh haw kan lo hmuah thrin che u kha ka mitthlâah a la châm reng a sin. Fanghmâ min rawn hawn dâwn tih hre rengin, kha Fanghma kha ah châkin, ka pa Iptepui min thruisak ngei mai kha ak chhuakin, kawng lakah kan rawn chhâwk thrin che u a nih kha, In ram riak lo haw lo hmuah che u kha a nuam thrin, mi nu leh pate kan tawh zut zut hnuah kan han inhmu ve thrîn kha chu a hlimawm thrîn tiraw.
Thil dangah pakai leh tawh ang sawi tûr ka ngah si, lo ngithla zel rawh aw. Tûna kan awmnaah hian Kohhran hrang hrang leh Biakin ropui tak tak a tam khawp mai a, mahse maw ka nu, inkhâwm tûr mumal pawh zuk awm thrîn lova maw le‼ an inkhâwmte lah chu, an ri che che chauh mai a, hetih lai hian ka rilrua lo lang nghâl chu, kan Kohhran-in Harhna kan chan laite kha a ni. Kha harhna avâng khân nang mi zakzum tak thrîn kha harhna khân a thrâwng tho ve che a, Biakin inkhâwm trantu nih pawh zak thrin khân, zahna awm hauh lovin Maichâm hmâah inzo taka i lâm laite kha a ngaihawm ta ti raw, tûnah lah pên khat pawh pên chhuak turin i ke a rit lutuk a ni si a.
Kha harhna kha chan ve tumin lâmtualah, khurh lâm chang ho zîngah ka luh ve pawh khân, kei ve chu ka lâm khawng ut reng ringawt mai kha a ni a, duh duha chan ngawt theih pawh a lo ni lo, threnkhat duh lo chung chunga chang tlat an awm lawi si. Hmânah hmânah, Harhna hmasa chang te zingah, Utrawk sawta sawt thrîn an awm a, Vai pakhat hian mak tiin Biakin kawngka atangin a lo thlîr a, chu harhna chuan a nuai ve ta thut mai a, “Het het, Mizo Pathian a tha lo” ti chung zelin Biakin chhûng lamah a sawt lût e an tih chu mawle.Thil mak ve tawk zawng ani.
Ka ngaihtuah zêl a kha harhna kha Kohhran Upa threnkhat, harhna hre thiam lo khan, fîm taka kalpui tumin an khak fak fak che u a, hlim hla kan sak kham loh leh in lâmpui nin theih lohte kha thlang duh lovin, solfa hla un pui maite kha an han thlang lui thrîn kha a ni a, a buaithlak thrîn ngawt mai tiraw. Kha harhna kha Kohhran thranna bulpui a nih nasatzia tunah hian ka hre zual deuh deuh mai ka ti. Harhna chang ve lo Kohhran ka hmuh hian, kan Kohhran kha ka ngai thrîn. Chutih rualin nang ka ngaih che a zual bawk.
Helam leh kha lam ti ang main thil pakhat ka’n zep tel leh lawk. Tûna kan kawmthlang lawkah hian Dawr lian zet mai chhâwng li laia sâng, duh duh thlan theihna ni âwm hiala thil chikim zawrhna. Thuamhnaw, bungrua, khâwl lam thil, Thlai hring leh ro chena thlan tûr awmnaah, mâwi lutuka an rem lai, kan duh duh kan pawt thla a, nawrlirhin ka nawr kual zung zung mai a. Thil lei a awlsam teh asin. Chutih laia ka rilrua lo lang thrîn chu, kum 10 mi lek ka nih laia, Silchar Vai hovin Lawnglêng hmanga an rawn tawlh chhoh, Tuirial phaikuama Thingrem lei tura ke ngata min kalpui kha a ni. I la hre ve reng em ka nu ? Zîngkârah kan chhuak a, kawng lakah chawfûn kan ei a, khaw thim hnuah In kan thleng leh chauh a nih kha. Haw kawnga ka tuihâl lutukin, Mau tui pai zawnga, Mau ka sah chhoh zak zak lai te, Tui kan hmuh lawk loh avanga Changel Tui min fehtirte pawh kha ka la theihnghilh lo asin.
Kan hun kal tawha i thiltih ka mitthlaa lo lang leh thut thrîn chu, Mizorama Buhfai uih kan dawn lai kha a ni, kha Buhfai dum mum hêl hûl, hânna nei miah lo kha, keini naupang ho chuan kan ei thei lova, Atra min siamsak thrîn a nih kha, Atra lah kha, kan mawmna tur Têl kan nei si lova, ur ro ringawt kha chu kan ei ning a, Mizo Chhangban chhuma min chhumsak leh ringawt thrinte kha mitthlaah a la châm reng mai ka ti.
Khatih lai khân, Ka pu Mâma’n Aizawl atangin Buhfai a rawn supply hlauh mai a, Kan Inah khân Buhfai bag kan rem ta ul mai. Ka pu Mâma khân thingtlâng chawhmeh kha a ei ve nawk nawk thiam si lova, Vawksa zuar awm laiin a lei teuhva, kan rapchungah khân i rêpsak dul kha, keini naupang ho tân khân chil ti puttu a lo ni a, meilum kan ai chânga kha Vawksa rep pawhthlâk tuma kan ban dêk dêk apiang khân, “ Khawih suh u, i pu ta a nih kha” tia min khap trinte kha i theihnghilh daih tawh ang tiraw.
Ka nu, nangmah ka ngaihtuah chânga ka rilrua lo lang ziah dang leh chu, ka nupui neih dâwna min lawmpui tura in lokal truma, Thlawhna Ticket confirm loh nena Airport in pan i sawi chhuah kha, kha thu kha Pathian thu ka sawi chângte hian ka la telh fo thrîn asin. A ni ngawt mai ti raw, Thlawhna ticket confirm neite chuan, lungmuang takin Thlawhna an lo nghâk a, nangni chuan ticket confirm loh in neih avângin, thaw dêp dêpin, kan inneihnaa tel ve theih loh hlau rêng rêng khân, kha terminal building-ah khân in awm a ni si a. Vanram kalna kawngah pawh hian ticket confirm loh nêna kal tum chu a buaithlâk ngawt ang ti raw.
Sawi tûr ka la ngah lutuk, mahse i chau lutuk ang e, mu hahchâwl tawh mai rawh. Taksaa kan inhmuh leh theih nân ka tawngtai thrîn, kan inhmuh leh ngei pawh ka ring, hmânnia i natna avanga, mumal lo zeta i tawng thin zia ka unauten min hrilh hnu khan, hei, rin loh takin i lo harh chhuak leh a, nichin lawka phone-a kan inbiak pawh khân, i trawng a la fiah thra lutuk. Thu awmze nei takte chu i la sawi lehnghâl. “Harsatna kan tuarte hi Pathian remruat a ni thrîn” i la ti hrâm hrâm thei a. Mahse ka nu, harsatnaah pawh thihna êm hi chu thleng lo se ka duh thrîn, i chungah lek phei chuan la thleng lo se ka duh lehzual.
Kan duhthusâm hi Pathian duhzâwng a nih lohva, taksaa kan inhmu thei tawh lo a nih pawhin, heihi erawh ka tiam ang che. Vanram kawtchhuahah min lo nghâk la, kei chuan ticket confirm nên ngeia nangmah tawng tûrin, tûna ka lei nun hi ‘Krista nên’ hman ka lo tum zel dâwn nia.
10 comments:
A ropui hle mai. Nu te ropuizia hrefiah apiang hi mi Puitlin an lo ni.. I puitling ve deuh dawn tihna a nih hmel..hehe.
Ka chhiar chhuak dap mai. A boring hauh si lo.. A ropui e tih bak sawi vak dan ka hre hek lo..
Pathianin i nu chu vengin chakna pe se, lo awmpui mawlh rawh se.
Duhsakna sang ber nen,
-cobby cobster
Keipawh nu tha PATHIAN in min pe hi ka va lawm em!
Kan nu leh pate hi kan duat viau tur ani, hah takin kawla ni chhuak chhiarin kan tan hna an thawk a, an tan thiltha kan tihve hi kan bat tlat a ni.
"Ka nu, ka nu duhtak chuan " tih khi Pi Nuchhungi phuah ani ta em kha ? Pawl 2 ah nitain ka hria kan zir kha !
I vaipa sawi khi ka tan lutuk. Kohhranah harhna atlak hlimchhawn, boruak nut phut lai hi angaihawm ve thin khawp mai.
Touching! Unaupa kei chu nu ka nei tawh lo... An thih hnuah hian an hlutna te hi kan hre dawn chauh a ni tak si a!
A hmasa bera comment tu sawi ang deuhvin, boring miah si lovin i van ziak thui thiam hle mai!
Buai laia mizo ( a bikin thingtlang lamah) chhungkaw ho lo khawngiahthlak dan tur zia kha aw! Naupang eitur neilo mawlh kha an khawngihthlak
Nu te hi an van hlu tak em. Ka nu hian min lo thihsan thut ta se tih ka suangtuah ringawt pawh hian ka mittui a tling titih nghal ringawt thei nia.
Nu fel tak i nei a, i vannei hle mai.
-bmw
A van roupui ve le.. Nu leh pa te hlutzia hi ka thiante Nu leh pa la nei te bulah hian ka sawi ve fo thrin. Ka Nu damlai a Biak lamtuala an lam darh darh mai thin te, Kohhran inkhawm piah lamah Biakinah Tawngtai tura min hruai lai, naupang te mai kan la nih lai te min ti hrechhuak a, kawng tin rengah nu leh pa te hlutzia min ti hrechuak thar kher mai.. A dik a ni NU leh Pa te hi zawng an hlu a, an hluzual zel a, an thih hnu thlengin an hlu tulh tulh mai zawng a nih hi...
Nang zawng i nu hnena lehkhathawn nachang hria leh thawn thei a i awm hi i vannei e. I nunen inhmuhleh ngei natur a Vanram ticket confirm ngei mai neih ngei i tumna rilru hi a ropui ka ti khawp mai
Zep nak emaw, he comment ka ziahlai hian ka hnuk a ulh treuh nia mawle... Ka Nu leh Pa boraltate min ti hre chhuak chiang em a ni. Mahse, kan duhtak mual liam tawh te, han ngaihtuah chhuah thar leha, anmahni ngaia LUNG AN LENG veng veng thrin hi, anuam nge a hrehawm tih ka hrethiamlo na a, Hlimna leh lawmna nazawng nen hi chuan ka thleng phal hauh si lo. ( a va sei ta em ve le)
hnuk ulh teuh in kan chhiar..
Dear Te, Vawiin i Nu Hmangaih tak mai vui zawh a ka Dawr ka thlen leh veleh 'ENTEH MAW KA NU'hi ka chhiar leh a, tuna i rilru nat tur zia suangtuah in i tawrhna ka rawn tawmpui che asin.Nu hmangaihna ropui zia bakah thuchah ropui leh ril tak in phum tel chu Vanram ticket confirm loh kawltu hi kan ram ringtu leh rawngbawltu ah hian kan va tam awm ve aw...Kristian nih mai hi a tawklo, dikna leh rinawmna nun pui a va tul teh lul em.
Unaupa hetah hian ka'n ti leh mai ang e aw. A pawi ka ti, a pawi tak zet! I Nu ruang pawh hmu thei lo va i awm kha a nat tur zia ka hrethiam pha vein ka hria. Keinin a ruang kan kil laia nang, a fapa ber i awm ve thei lo kha a hrilhhaithlak lutuk!
A thih hma lawk khan ka va kan a, he thuziak ngei hi i unauten an chhiar sak thute a lo sawi a. I chanchin sawi nuam a ti. Chau deuh mahse a titi peih a, kal mai turah ka lo ngai lo asin!
Mahse i Nu zawng hahchawl tawh turin, a ngaih ber Lal Isua kiangah, i Pa awmnaah a kal ta a. Keini pawh hian engtikah emaw kan la zawm ve ngei ang. Pathian thlamuanna kan lo dil sak ve reng che u a nia.
Unaupa a mak ti raw, nang chu Pa i la nei tal a, i la chang sang zawk e. A mak khawp mai, a mak teh thut a ni.
Post a Comment