Family Photo

Friday 21 November 2008

Ka lung min len

Cell Phone leh Coca Cola culture atang hian, kan sulhnu (Sephung laih culture kan ti ve mai dawn em ni ?) ka thlir changin ka lunglen a zual thin. Mahse lunglen thu chu ziak fung hmanga ziah fiah a har hle si, fiah zo lo mah se lunglen thu sawi chu tu’n min sel lawng chu tiin Sephung laih thu atangin bul kan tan ang.

Khatia Vawk ek verh sata Sephung kua a lo awm kha chuan, phur fahranin laih hmasak kan inchuh a, Bawng ek Sephung ai chuan a huai ngei dawn tih hriain, a hmu hmasa tu nih pawh kan intithei nghal lar mai a ni. Chutichuan, kan beiseih ang ngei, Sephung ki tha ber bawr kan han lai chhuak ngei mai a, kut zungpui leng tawk velin lei kan hai khuar a, thiante Sephung nen inhawitawnin kan dah a, an inpan ta hriau hriau mai le, mumang lamah pawh vawi tam tak kan lo mangphan, Vawk ek Sephung ngei mai chuan thiante sephung a si tawlh dar dar lai han hmuh chu, kan tun lai Tom and Jerry film ai mahin kan hlimpui zawk a sin. Aw... kha ka Vawk ek Sephung te kha aw.

Zan Pawnto: Khatih lai hun khan zan pawntote kha a nuam thei helh helh a sin.
Kha lai Thing sat ri koh koh kha tunge ni ?
Keimah Sanghalhriama pa
Nauva thei thur ei zo tu
Engtik laiin nge ka ei zawh ?
Hmana hmana i fa lu bawk te nena in khel rik bep bep kha
A hmin nge a hel ?
A hel pawh a hmin pawh
Insualah nge inbuanah ?
Insualah pawh inbuanah pawh
Zat leh zaat.... insualah. Zat leh zaat.... insualah.

A va nuam thei laih laih tak em. Khatih laia kan School zirtirtute khan Home Work min pe ve ngai lo, kan zir chin chu School-ah min thiam tir nghal vek a, kan ban dawn apiangin Mai a lum e huiah tih kha min sawi chhuahpui ziah bawk.

Mahse, zan pawnto kha chu VDP awm chin kha chuan an phal ta meuh lova, keini a hrat fal zualte khan, khap mah se kan la pawnto lui vei rawk a le’h. VDP an lo kal ....tih leh mi In hnuai a bihruk kan rual a, Toarch Light-in min rawn en ta pup pup mai, tlan chhiat ngam ni tawh nghal lo. Hruiin min thlung khawm dul mai a. Awi ka nuu.... ti dek dek kha chu an vaw pawp zel a. Min sawi thaih a "Thana-ah kan dah ang che u, in ek in ei dawn a ni mai" an tih phei kha chuan, ko phak ni ila ka pa ka ko chiang bal ang. Khatih lai a ka pa kha, khawvel a mi zawng zawng ngamtu a ni miau a.

Tui chen: Kan khatih lai khan, kan Swiming Pool neih vete chu, fur laia tuihawk tling khawm kha a ni ve mai a. Chu tuihawk tling khawm chu, tlai School ban leh Inrinni te hi chuan lun tak a ni. Chhungte hriat lohvin chu tui tling nu tak chu tlan chung ngatin kan han pan a, thianten min thlen khalh ang tih hlauvin, ke zungpui chhuih thi sung khawpa chakin kan tlan thin, mahse a thleng hmasa kan ni ngai tak tak chuang lo. A thleng hmasaten duhtawka an chen nut sa chu tenna reng nei lovin kan han zuang thla ve tawp mai a. Tui cheng thiam nih duh vang hrim hrim khan, Beng leh Hnar leh Ka-ah a lut dawn tih hre reng chungin, mit chhing sur sur chungin kan zuang lut a. Chutih laiin aia ute an lo thleng a, tui atanga kan chhuak tur kha min lo nam pil zui leh a, thawk lak hman ni tawh nghal lo, Tui nu zet chu duh aia tam kan hak bawrh a, puar ul khawpa chu tui in chuan kan inham chhuak tawih tawih thin, mahse kan sim phal chuang reng reng lo.

Mas: Khatih laia kan Mas kha, Mas tak tak a va ni chiang em. Tlangsam a par atang rengin a Mas tan tawh a, nu leh paten thuamhnaw thar min leisak dawn bawk, halpuah leh silai lem pawh min lesak an tum. Pocket money atan thingfak kan tuak a, Ui pum tia leng lawng hi Chem ngatin kan kit a, duham luatah zawh tawk aia rit hret kan kan pu haw taih taih a, In lamah nuten min lo eh phelsak a, fak 30 Rs.1/- in kan zuar thin. Rs.10/- man kan tuak daih hman chuan Mas chu cho tak kan ni.

Mas a lo hnai ta, Hnah la hlui an siam dawn avangin, chhang funna tur leh chaw eina tur Changel hnah lain, phur fahranin daiah kan liam diah diah thin. Changel na na na ren miah lovin kan kit pawp pawp mai a, a zung thler thiam ve loh avangin hnah 30 hawn turah kung 10 laite kha kan kit thin.

Biakin chei nan Tartiang kan la ngei ngei bawk, Tartiang chu Kuva kung ang deuh hi a ni a, feet 10 chen vel hi mi pakhatin kung 10 te kan pu haw thin, Biakin hungnaah leh Biakin thuthlengah kan tung fur mai a, Pulpit sir tuakah pawh phunin, thusawitu dip phak lo tawk velin a hnah kan tawn zawm a, Baloon leh lehkha cheh mawi kan thlun beh phei chuan, Biakin chhung chu a ngaw khung tawh mai a ni

Zan tlaivar ngei ngei tur, kan hlim emaw hlim lo emaw Mas nawn kan duh chuan kan tlaivar phawt tur a ni, tih ngaihdan nghet tak kha kan nei a. Zai tha ve peih lo, Mas meipui ai ho hlei hlei kha tlaivar tum an ni a. Zing dar 3 a rik tawh chuan, Kohhran ho In tinah lutin Mas nawnna tur pawisa khawnin kan Carol thin. A va nuam thei hep hep em.

In tinah chhang ban ei tur Belpuiin kan chhum khu vut vut thin bawk a, Mas chhung zawng khan ei tur kan tlachham ngai lo a sin. Khatiang U a ma kha tunah chuan a bo zo ta.

Thang kam: U-te hnung zuiin Thingtumbu rah tlan Thangthleng kamnaah vawi duai lo ka kal ve thin. Thang en tuk chuan tho hma thei tak kan ni. Tuklo, Tawllawt a lo inhren beh ngar phei chuan kan rak teng tung mai thin. Tui tlan Sava thang kam pawh kha a nuam chiang a lawm, thang kam tukah thang enin, lui hnar atangin kan han chhuk a, Thang ngul a lo kan auh chuan "Eng tak awk ang maw?" tiin phur fahranin lung nalah kan tawlh tha zawt zawt a. Vate takngial pawh lo awk se, kan hmu lian viau tho. Ramparva ka awh tuma, Sate-in min lo ei then sak kha chu tun thlengin ka la ui.

Tlema kan len deuh-ah Sahdal thang leh Thangchep te, Beai thang kamte kha ka thiam ve tawh a, awk thei pawl ni lo mah ila a hrat pawl chu ka ni ve hrim hrim, Beai thang, Ramar leh Vahrit awh ngei ngei ka tumnaah, sazu ka awk mauh mai kha chu, nuih za lamah a kal zawk. Ka pain Thumi Fal a siam min ventir a, a ni kahtnaah Pit Sava 20 teh meuh ka delh a. a ni hnihnaah Vathu 2, a ni thumnaah Ramar ka delh tum ngat kha chuan, Thangchhuah-ah ka inngai tawp.Tunlai thalai hovin "Bawn tawp" an tih aiin a bawn zawk tawp.

Thlaam hualin Vaithang ka kam a, ka pa Mangkhawng delh aiin ka awh tam daih zawk tuma ka intihtheih zia mai chu.Thlam sawi takah chuan, Zupawl tuam kha asin nuam ni, Thlam bul Buhpawl-a Sazu riak kan han chil chhuak a, Uten Len-in an lo man chik tawt tawt mai a, zanlaiah a thau tha tha, Muk hnah nen kan han pum chhum a, riltam vawrtawpah kan han keih chhum hmawk hmawk mai chu.... awi, ka chil a la ti put.

Kilen zar te hlei hlei kha a sin nuam chu. Mau pahnih hmawrah Len hlai hlep hlawp kan tawn bet a, Kilen zarna mau tun chhuah remchang turin, Mau ban pahnih, kawng chen vela sang kan phun a, a hmawrah mau tlawn pakhat kan kham a, Vaki liamna thin kawnah, Vaki rual lo liam changin kan thu khar mai a, "Ki ki" a tih ri kan hriat tawh chuan, thawk pawh kan thaw tha ngam tawh lo, beiseih ang ngeiin kan Kilen zar a rawn su ta, kan mau tun pahnih chu insi rawpin kan khawm a, Lena Vaki tang te teng tung chu Leiah kan han tluk a, an thlawk chhuak leh hman ang tih hlauin, an Luah kan seh sawk sawk tawh mai a ni. Nuam tak a ni. Vanneih phei chuan Vahui rual pawh man chang pawh a awm a sin.

Sava veh: Sava veh tur awm tawh lohna rama kan chen hnu hian, kan tleirawl ve ek ek hun a, sava veh nuam kan tih theih zia kha. A ruka ngaihzawng neih lai ngei mai khan, ngaihzawngte tui chawi en thlak pahin, Tuikhur kawng chhakah, Sava thawm leh Hmeichhe Tin khai ri kan ngaithla kawp a, a ruka kan ngaihzawngte kan chan chhuah phei chuan, Sava reng kan ngaihtuah tawh ngai lo, kan be ngam pawh chu a ni lem hlei lo a, aw kan han thian kharh a, an rawn hawi chhoh zauh chuan, kan lo lawm ve veng veng mai nia maw le.Sava kan perh thlak tawh phei chuan, a hmul kan pawt thawt a, an hmuh ngei tur khan kan han chhem leng chem chem mai chu, min ngaihsan ve hmel khawp thin a sin. Tlaiberh, Tukhumvilik, Chhawlhring, Kolrit tih ang vel kha chu ka perh thla ve nual tawh.

Tum khat chu ka U nen, kan In bul Zawngtah kunga Thizil Sava fu khawm kan perh a, an thlawk huk a, kan bula inchhawng chu an su ta tuk tuk mai a, kan bul velah an rawn tla tawp tawp mai a, chutia Sava tla kan chhar ta nghauh nghauh mai chu mumang a ang rum rum zawk. Chhum zing chuai chuai avang khan, kha In chhawng var vo kha chhum emaw an ti ni ngei tur a ni.Tunah hian khang Thizil Savate kha khawiah nge a awm tak ang aw, an thawm hriat tur lah a awm der tawh si lo.

Sangha man: Sangha man rau rauah, Ru leh Hlingsi raha Sangha man ai chuan Chinaia man kha a nuam fe zawk. Tum khat ka Ute nen Hlingsi rahin Sangha kan vua a,Hlingsi rah chu kan chhum hmin a, chu Lui teah chuan a tui kan leih a le’h, a phuan ta bulh bulh mai, lui dung tluan chuan a var vo mai a, Hlingsi phuan kara Sangha rui man chu buaithlak tak a ni, a phuan a reh tawh chuan Sangha an lo harh leh tawh si a, kan ei khawp pawh kan man ta meuh lo niin ka hria.
Middle School kan kal lai a, Picnic-a kan kal a, Chinai hmanga Sangha kan vuak kha chuan kan man tam khawp mai. Chu aia nuam zawk chu, ka pa nen nghafuan kan ven tum kha a ni. Nghalim rual, dum khup mai, Lui te hnar lamah an lo tui tliar tliar a, thawm dim em emin kan lo thlir a, an tui zo ta maw tihah chhak lam atangin kan hnawt thla a, kan Bawng dawhah an tla per sup sup mai chu, NLUP dawng ai mahin kan hlim zawkin ka ring. Sangha Tui, a tui chhuah tawh, Tui ami ruh leh chu tih chi loh tak a ni, chhum mah ila a hmin thei tawh reng reng lo nia.

Hlawh tlem: Pocket money atan inhlawh kha kan hrat khawp a. Inhlawh azawnga ka inhlawhna hlawk lo ber chu, Forest Department-in Road Side plant an phunna tur, phelsepa a hungna tur kan siam tum kha a ni. Mau sah chawp, phel chawp, bial nalh tak hungin pakhat hung man Rs.5/- a ni. Nilengin 5 ka hung ve hman a, tlaiah a en dik tu a lo kal a, ka thil hung chu chhia a ti ngang a ni ang, a nam thlu ta mawlh mawlh mai a, pakhat chiah min zuah sak a, a tuk zingah phur fahranin hlawh la turin a Inah kan kal a, ka thil hung chu a lung thlu tak tak chuang lo, khawngaih hlawh Rs.2/- min pe.

Saihlum hrual pawh kha a hlawk lo khawp mai, 1000 kha Rs.1/- in kan hralh thin a, zingkarah Tlumpi lei tih so umin, thiante hmakhalh tum reng rengin, khaw vawt karah kan tlan chawn chawn a, hlum so lum vat vat kan han sawk tan tan a, kut chat rum khawpin kan hrual thin a nih kha, thianten vawikhatah pali te an hrual theih laiin, pahnih chauh kha mum tha lo zetin ka hrual chhuak ve thei a, Rs.1/- man hrual chhuah chu hautak deuh a ni.

Mahse, Pioneer (Santal) Camp-a Antam zuara, "Ka pu, sabji lei duh em" tia kan luh dak dak te, Ankhapui leh Hmarcha zuara Bazar kawng sira ka thutpui tumte kha chuan Rs.10/- hi chu kan hum thlan ve dup thin a nih kha maw le.

Tlangsam bawh: LP School tlangah, at huai kan ti dawng nge, hlauhna reng reng nei lo khan, a tangkaina pawh awm miah lovah, Tlangsam phul kha, dul khem nuanin kan bawh thla thin a nih kha, pem damdawi lah chu Japan hlo a tha tiin, a tui kan nuai chhuak a, kan sawr mawlh mawlh zel mai maw le.

Chawhmeh zawn: Thlasik chul ram chawhmeh zawnga chaw fun nen kan thawk chhuak thinte kha, lung a va ti leng ve tho em. Tumbu, Aidu, Phuihnam chawr no, Chingit zik no, Thingthupui zik no te nen ip te puar laha kan ah haw theih chuan mi hlawhtling hawin kan haw a, kan chawhmeh hawn tui lam ai mahin a boruak kha a ni hlimawn chu.

Chakai meichher chhit: Dai ami Aibuh kan chhat a, chawhnu her lamah kan rawh rim nam cham cham a, kan thler sin sang mai a, Ip te puar lahin lui lamah chaw fun nen kan liampui a, Lui dungah Lungin kan delh thla zauh zauh a, khaw thim nghakin meipui kan chhep a, meichher tur mau pum tha satin, a chhungah Khawnvartui kan thun a, puanin kan hnawh tawt a. kan peih fel veleh chaw fun kan phawrh a, Bekang ro leh Nghathu fun kan thet nam hak a, zan thim hnuaiah Lui tui luang ri kar kar ngaithla chungin, puar lahin kan ei thin. Khua a thim tha ta maw tihah Chakai man turin Lui dung kan zawh chho ta, Aibuh kan chah ngei mai kha, Chakai bawpui lian fahran mai khan a lo chep hriau hriau lai kha kan man chat chat mai a, Ai ipah kan khung nghauh nghauh mai kha chu nuam ve tak a ni. Mahse man tam tawh chuan, Ai ip ak tu nih kha a nuam lem lo. Chakai thli kha kapah a luang thla a, kap thip hlurin kan kal hnak hnak thin.

Sawi vek sen pawh a ni lo, Thlasik apianga Antam tui pek tur Tui, Tui um pahnih khirha, tui kan chawi tang tang lai te, Tui um Culture pelh hnua, Plastic Galon kan put khuar dawk dawk thin ziate. Dai bula Chaihchun Lu bur tiat tiat ka chaih haw thin te, Telhawng pa vai-a Vawk kawng kan zawh kut kut thin te, Pioner Camp-a Ata ei bang chang a, chawlhni tlaia thiante nen kan phei dam dam thin ziate kha, kan boruak hip chu sang lo ve tak a ni.

Pastor Bial Naupang Sunde School khawmpui kan lak nat thin zia leh nawm theih zia kha aw.., khatiang khawmpui kha khawmpui zawng zawngah a la pui ber awm e. Veng thenawmah ke ngatin nilengin kan kal thin, Pakhatna kan nih hlauh phei chuan World Cup Champion aiin a nep chuang lo a sin.

Nu leh pate Buh lak sa, Fasuar-a kan lo pal darh chuai chuai thinte pawh khan lung a va ti leng tak em, Tunah chuan Fasuar chu a lem nen meuha sawi fiah a ngai ta. Kan kawmthlanga kan Ar leh Ramar kan insualtir te pawh kha, tun lai mite tan chuan thawnthu ang a ni ringawt. Kar tawp holiday hmang tura zirtawp ni apianga, tlai School ban veleha, Lo lama riak tura, feh kawnga kan kuk thla noh noh thinte hlei hlei khan ka lung min len. Tunah chuan Chhekin a awm tih pawh hre lote zingah kan khawsa ta si a.

Hmeichhia an tha

Kan chenna Lei hi a vir mup mup a, a vawikhat her chhuah-ah Hmeichhe tharlam engzat tak herchhuahpui ang maw ? Keini chhungkua ve chu hetiang hian kan lo ni a, kan ni kan ni mai a ni. A hmasa ber atan mipa emaw hmeichhia emaw a pawi lo ve ve ti chung rengin, mipa a nih theihna chhinchhiahna tha tak a lo lang tlat si a. Chu chu hei hi a ni, mipa chu ding lamah an che nasa thin an tih sup sup avangin, Nu ber pum ding lam a che nasa si a, a che mai ni lovin a hnek pawp mai dawn emaw tih khawpin a pawng zawrh zawrh tlat alawm, mipa a ni ngei ngei ang tiin, "Mapuia, Mapuia..."tih pahin nu dul kan zut ta hiau hiau mai, koh sual ka inring lo bawk, pum chhung atang rengin a che pa tlat.

Nu pum ding lama inkhuar, kan nghah Mapuia chu, he mi khawvel, retheite rahbehna hmun hi a rawn dai ve hun a thleng ta. A hmasa ber a ni bawk a, Private Hospital-ah ngei le tiin, nu pum nat pawh hre chang lo lekin kan phe vat vat a. Nu pum a na zual, Labour Room-ah an nawr lut. Eng thil nge lo thleng dawn ? zai a ngai ang em fuke kimin nau apiang ang em ? rilru kimin a piang ang em ? a hmel tha ang em? ang em, ang em ? hlir a ni ta mai. Thin hi a phu dep dep mai a ni, khua te pawh a har rum rum thei asin. A reh vung vung mai a, min nghahpui tu thenrual tha ten min fiam a, a derin kan nui, nuih a za miau lo a lawm.

Khai le a lo piang ta, mipa naupang chum beng buang an tih beiseih ran ran laiin, a ni lo, hmeichhia a ni zawk. Mak thei ngei, experience kan la neih ve loh avangin, a nei tawhte thusawi kan lo awih ve ngawt a. Pathian thu lo chu tu thu mah awih loh a him ber a nih hi ka ti rilru nghawng nghawng a.
Mahse pawi tia vial ngawl ngawl turah min ruat lo la, he thu hian a lo inhnem ve theih khawp a sin. Fa hmasa ber chu hmeichhia nise, nu puitu atan, mipa aiin an chhawr hma theih zawk. A va tha em, hmeichhia hi an tha a ni.

Beng teh: A pahnihna chu mipa a nih theih dan tur kawng dang min sawi hmuh leh ta. Nu beng sei zawng teh lam a ni. Ding lam a sei chuan mipa a ni duh, za-ah sawmriat panga(85%)a dik an tih chu maw le. Chuti chu pum chet lam ai chuan a rinawm zawk alawm tiin, nu beng kan teh leh ta ngat ngat mai, a changin ding lam a sei, a changin vei lam a sei leh zawk emaw ni ? a inchen reng zawk emaw ni ?. Thla sarih hnu lama tehin a dik duh an ti leh zel. Yes, ding lam a sei zawk chiang a lawm, teh zel ang, teh zel ang, Revd. Chuauthuama Isua Thlan teh aia uluk zawkin kan teh ang. Thla riat leh a chanve a ni ta, a la sei zel, ngaih that lohna tur a awm tawh lo, ding lam leh vei lam inseihleihna pawh Sut hnih lai a ni, a chiang khawp mai.

A hmasa kha a har lem lo bawk a, Private Hospital kher a ngai love, tha tein a nei ve leh mai ang tiin Hospital hnai ber kan pan ta. Khai le naute a tap ta rang rang mai, a aw pawh a pawr deuh a lawm. Nau tuamna tur puan rawn la rawh u... Sister mipa nge hmeichhia ? A nui sak a, ka lo nuih tlawn vel, mahse in nuih tlawn chi pawh chu a ni chuang lo. "Hmeichhia" bawk chu kan chan a ni leh ta.

A pawi lo, ka ti lehpek thin ang a pawi lo, hmeichhe inzawn hi a tha zawk daih, an unauvin an inkawm thei a, mi dang kawm lova an seilen chuan, an nungchang pawh a tha duh zawk. A lo va han pawi lo tak ve le. Hmeichhia hi an tha a ni.

Nu-in a tuar: A pathuma hi chu tuma thu sawi kan awih tawh tur a ni lo, Pum chet dan an ti, Beng sei zawng an ti, a dik lo ve ve, a khawsakna a ni a, a duh lam lamah che rawh se, Beng sen hlura inteh inteh a tulna a awm reng reng lo.Nghak chhuak tawp ang kan ti ta. Mahse maw, nu ber ei duh zawng a danglam leh ta tlat mai, hmuihmer a ei thei lo, thil thur lam a duh huam huam reng mai, a taksa pawhin a tuar nasain a cher ruam bawk, mipa fa pai chu nuin an tuar duh an lo ti lehzel a, beiseih loh ngawt chi pawh chu a ni leh ta lo. Engkim a danglam vek si avangin, "Mama, Mama" tiin nu pum kan zut leh ta hauh hauh mai le.

Khawvel hi a lo changkang tawh khawp a, mahni remchan hunah naute pawh hi a lo neih theih reng tawh zuk nia maw le. Engtin maw ? Tin, heti hi a ni a, zirtawpni-ah Doctor-in a en a, "Nau bawm a inhawng tawh, pum nat veleh rawn kal vat ang che u" a ti a. Awllen laia neih theih ngeina turin exer kan la, pum a na thei chuang si lo. Sunday-ah neih tur, naupang School kal buaipui ngaih loh lai tak a ni tiin, zing dar 7 ah Hospital kan pan a.Nau veitirna hmanga neih theih kan in beisei, a lo theih chiang khawp.

Hospital lianah chuan nau nei tur ringawt pawh hi an lo tam khawp a, Varandah-ah an mu dul mai a. Unau Doctor (Mami) neih manah, chung waiting list zawng zawngte chu kal kanin Labour Room-ah kan lut nghal riap mai maw le.

Kei pek chuan ka va zui lut ve thla rawk a, khaih khaih khaih, ramri pelin ka kal a ni. Nu sawm rual zet hi dawrh huangin an lo mu, chutiang chu hmuh tur a awm ang tih ngaihtuah nghal lovi, ka va let leh rang chiang em, ka zak lutuk, Nurse hovin min la hau zui, inti unau Doctor nei taka lut ve ngawt kha ka ni a, ani lahin lo kal suh ti hek suh, a buai em avangin ka thlen chin tur ramri lam a ngaihtuah hman bik lo a ni. Mawl luat vangin huang lo ka dai a ni. Min ngaidam ru ka pi te u, tu in ni nge ka hre chiang chuang lo che u .

Rei pawh nghak hman lovin "Nau te puan tuamna tur rawn la rawh u" E heu a va sam ve, eng mi nge kan pawm tlei leh dawn ? Khai le, tun tum chu hmeichhia a ni ve thung. A va mak teh bawk em ve le.

A pawi lo, keini chang hmeichhe nei zawn kan ni bik lo, mi dang pawh nei an tam, a Reverend zawng pawhin sawi tur ka nei teuh, Rev. Vanlalbela pawhin hmeichhe pathum, Revd. Chuauthuama pawhin fapa a nei bik lo, Rev. Rosiamliana Tochhawng pawhin pathum, Rev PC Lalbiaktluanga pawhin pathum, ka sawi zel dawn em ni, Suddenmuanga ziaktu Laisaizawka pawhin hmeichhe hlang paruk ngawt, mai mai a, a va han khawhar thlak loh tak em.

50% : In rin lawkna awm hman lo lekin nu ber a rai leh ta tlat mai le, a mak ngawt mai, nupa karah pawh tih palh thil thuin nau a lo pai theih reng a lawm maw le. A changkan loh thlak tiin chhungten min phun khum, kan changkang nge kang lo tih pawh ka ngaihtuah hman tawh love, mipa a nih chuan Vawk ka talh ang, ka zuk leh hmuam chin zawng zawng pawh ka nghei vek ang te ka ti vel.

Mahse mipa a nihna tih lanna tur ka dap buai duh tawh lo, chutih laiin Mami bawkin min la beiseihpui, Ultrasound la ang a ti sek si a, thla li hnuah an Hospital-ah, a Pu Doctor-a hovin kan va la leh ta a nih kha. Ka pu eng mi nge a nih dawn ? Kan khawl hi a chiang vak lova, 50% chu mipa a nih ka ring, a ai sang ka sawi thei lo, in duh leh Private-ah chiang zawkin en leh rawh u.

Hm... a tawk, Doctor berin 50% a tih chuan a chiang a lawm. A hmasa ber kha ultrasound an lak khan, hmeichhia a ang min tih sak a, a dik a. A dawt leh kha, a hmain hmeichhia maw in neih tawh tih pahin a nui ringawt a, rinhleh ruk angin a dik leh a. A dawt leh pawh anmahni medical term, XX, XY tih velin an titi sur sur a, a dik leh bawk a. Tun tumah 50% mipa a tih chuan a dik khawp ang, keini aiin Doctor in mihring kaw chhunga thil awm chu an hre chiang zawk, Kal-a lungte awm thlengin an hre thei a, naute thla li mi, hmeichhia leh mipa a nih chu an hre chiang khawp ang.
Ngaiteh, chu 50% chu a pian a lo hun a, a neihna hmun pawh kan thlang uluk khawp, Roman Catholic Hospital-ah, Video Camera nen meuh inchhawpin, kei fanu pathumte pa hian, kan 50% chu, Laisaizawka te pawl bye bye san inbeiseiin, zan dar 11:30 lam lam ah nui khi suk suk chungin, kan nghak chuak leh ta poh a nih kha. Hmeichhia bawk chu.

A tawk, Video Camera ka phawrh lovang, Vawk pawh ka talh lovang, zuk leh hmuam pawh ka nghei lo bawk ang, ka ti rilru sawk sawk a. Mahse chumi darkar la la chuan tih danglamin ka awm leh ta. Zel angin ka awm nge pawh ka hre lo, tuma biak theih ka ni lo, Ka thinlung chhung TV-ah, Hmeichhe fakna a rawn lang zut zut a, Miss India te, Miss World te, kan veng Miss te thleng thlengin, chung ho chu an vaiin hmeichhia zuk nia maw le !!. He ka chenna India ram sorkar tuaivir vel tu, ram dang atanga lo lut lehnghal, Sonia Gandhi pawh hmeichhia a sin.India ram lal ber, President Patil pawh, a Mizo tawnga Pa-til zawnga sawi pawhin hmeichhia a ni tho tho. Hmeichhe thuhnuaiah India ram zaupui maia mipa rual hi kan kal dul dul a ni lawm ni, kan pu Zoramthanga CM pawh Delhi tlangah hmeichhe malsawmna hawn tumin a cham rei phah thin an ti.

Hei lo pawh hi sawi tur tam tak ka la nei, Hmeichhia hi an tha, Mipa fa sual ai chuan Zawngtah kung khat pawh a tangkai zawk an ti, fapate ai chuan makpa ten puzawnte thu an awih zawk daih an tih avangin, kei pawhin puzawnte thupek chu pending ka tum ngai reng reng lo. Hmeichhe power hi chak deuh asin.

Hmeichhia tih takah chuan, hmanni chu Delhi nula, Youth Hostel-a thawk nen Silchar atangin Aizawl kan pan hova, kha nula kha ngaihtuahawm lo tak a ni. Kan chuang tan chauh tihah Driver-in Tape a play chu bengchheng tiin, "Off rawh i duh leh Studio-ah kal la ngaithla la a ni mai a lawm" a ti nghal bawrh bawrh mai a, an inhnial chho ta char char a, Vairengte Taxation Office atanga kan chhuak leh tur chu, hnung lama thu hian meizial a zu rawk mai a le, "Ding rawh ding rawh, ka chhuk dawn" tih leh chhuk a rual a, "Motor-a meizial zuk a thiang em ni?’ a ti ta siah siah mai. Mei zu pa chu a mei zuk kan paih tir a, kan nula chu kan thlem lut leh thei hram a, kalkawngah a rui chho ta, kan buai teh a sin. Bawngkawn kan thleng a, Mizo Taxi driver hnenah Youth Hostel hmuna dah turin a va bia a, a man an ti to niin a hria ni tur a ni. A inhauhpui leh ta phiar phiar mai a. Kha nula khan "North East ka vawikhat lo kalna" a ti kha a ni a, khatiang taka nula kawlhrawng kha Mizo nulate zingah hian awm ve tak maw ? tihte ka ngaihtuah mai mai a.

Wednesday 19 November 2008

It Begans!




I have never thought about creating a blog or a website (or whatever you call it) before. To speak frankly, I haven't even dreamed about it! The main reason being I am what you may call 'technologically challenged!' However, as the world revolves around and around, there comes a time when a person like me thinks about making a new world, that is, a blog! I would like 'this world' to be a place where I throw in some of my thoughts, and a place where I can stay in touch with people who are close and dear to me.




And so began the new blog.